Այսօր լրագրողների հետ զրույցի ընթացքում ԼՂՀ ԱԺ նախկին պատգամավոր, փորձագետ, «Անալիտիկոն» հանդեսի գլխավոր խմբագիր Գեղամ Բաղդասարյանն ասել է, որ թե՛ Հայաստանում, և թե՛ Ղարաբաղում իշխանությունների որակը չի համապատասխանում երկու հայկական պետությունների և հայ ժողովրդի առջև ծառացած մարտահրավերների որակին։ Այս անհավասարակշռությունը պետք է փոխվի։ Սակայն Հայաստանում և ԼՂՀ-ում իշխանությունը սովորաբար ձեռքից ձեռք է անցնում, մինչդեռ պետք է ոչ թե ձեռքից ձեռք, այլ գլխից գլուխ անցնի։

-Ի՞նչ նկատի ունեմ՝ գլխից գլուխ ասելով։ Այսօր իսկը ժամանակն է, որպեսզի հայտնվեն նոր գաղափարներ, նոր ուժեր։ Ամեն ժամանակ ծնում է իր հերոսներին, և ինձ թվում է՝ եկել է նոր գլուխների ժամանակը,-ասել է փորձագետը՝ հավելելով, որ այսօր մենք իրավունք չունենք նորից սխալվելու և թույլ տալու, որ իշխանությունը ձեռքից ձեռք անցնի։