Հայ ազգային կոնգրեսի համակարգող Լևոն Զուրաբյանը «Փաստարկ» ակումբում հայտարարել է, որ վերջերս հրապարակված հայ-թուրքական արձանագրությունները բացահայտեցին «այս բնագավառում ռեժիմի վարած քաղաքականության սնանկությունը»։ Լ. Զուրաբյանը նշել է, որ, այսպիսով, Հայաստանն ընդունել է Թուրքիայի նախապայմանները, մասնավորապես՝ պատմական հարցերի միջկառավարական հանձնաժողովի հաստատման և սահմանների անձռենմխելիության ու տարածքային ամբողջականության ճանաչման կետերով։

Լրագրողները Լ. Զուրաբյանին հարցրել են, թե այդ դեպքում ինչո՞ւ է Հայ ազգային կոնգրեսի կենտրոնական գրասենյակի հայտարարությունում նշվել.

1. Հայ-թուրքական հարաբերությունների կարգավորումը բխում է երկու երկրների և ժողովուրդների, ինչպես նաև՝ տարածաշրջանային խաղաղության և կայունության շահերից։

2. Հայաստանի և Թուրքիայի միջև դիվանագիտական հարաբերությունների հաստատման և երկկողմ հարաբերությունների զարգացման վերաբերյալ արձանագրությունները զգալի տեղաշարժ են այդ ուղղությամբ։

Լ. Զուրաբյանը պատասխանել է, թե զգալի փոփոխություն, իրոք, կա.

-Քանի տարի որևէ տեղաշարժ չի եղել. ստատուս քվոն պահպանել են։ Հիմա ստորագրվել են ինչ-որ արձանագրություններ, որոնք զգալի տեղաշարժ են նշանավորում։ Այդտեղ ոչ դրական, ոչ էլ բացասական բան կա։ Այն, ինչ որ մենք համարում ենք բացասական, երրորդ կետում ասել ենք։

7or.am