Հարցազրույց Արցախի «Ազգային վերածնունդ» կուսակցության նախագահ Հայկ Խանումյանի հետ

–Այս օրերին Արցախում ինչպիսի՞ տրամադրություններ են։

–Ադրբեջանական հետախուզական խմբի թափանցումը և նրանց կողմից Արցախի տարածքում խաղաղ բնակիչների սպանությունը մտահոգությունների տեղիք տվեցին: Սակայն խուճապի մասին խոսելը չափազանցված կլինի. արցախցիներին խուճապը հատուկ չէ: Այնուամենայնիվ, բազմաթիվ հարցեր առաջացան, որոնց պատասխաններին դեռ սպասում է հասարակությունը: Մասնավորապես, այն, որ բազմաթիվ տեղեկություններ կային նախկինում ևս ադրբեջանցիների թափանցման մասին, սակայն համապատասխան մարմինները դրան հատուկ ուշադրություն չէին դարձրել:

–Որքանո՞վ եք հնարավոր համարում պատերազմի վերսկսումը։

–Ակտիվ պատերազմական գործողություններն ամեն վայրկյան էլ կարող են սկսել: Ես չեմ կարծում, որ այժմ դա բխում է ադրբեջանական ռեժիմի շահերից, և, նմանապես, չեմ էլ կարծում, թե հայկական կողմերն այս պահին Արդբեջանի տարածքում լայն ռազմական գործողություններ վարելու մտադրություն ունեն: Այնուամենայնիվ, ակտիվացած հետախուզությունը, ռազմամթերքի կուտակումը, ռազմարդյունաբերական համալիրների ստեղծումը ցուցիչներ են, որ կողմերը պատերազմի են պատրաստվում: Այս փուլում կարևորում եմ բանակում ակտիվ բարեփոխումները, այդ թվում՝ Պաշտպանության նախարարության և գլխավոր շտաբի ամենաբարձր պաշտոնյաների փոխարինումն ավելի արդյունավետ ռազմական գործիչներով, առաջնագծի զինումը տեխնիկական նոր միջոցներով և, ամենակարևորը, թերբնակեցված շրջանների վերաբնակեցումը:

–Իսկ ինչո՞վ եք պայմանավորում հայտնի գործարար և բարերար Լևոն Հայրապետյանի կալանավորումը։

–Լևոն Հայրապետյանի կալանավորումն ու ձերբակալումն ինձ համար տարօրինակ են. առաջադրվող մեղադրանքը նման է շինծու գործերի մեղադրանքներին: Բավարար ինֆորմացիա չունենալով՝ չեմ կարող վարկածներ առաջ քաշել, սակայն Արկադի Տեր-Թադևոսյանի առաջ քաշած վարկածը՝ ադրբեջանական պատվերի շուրջ, արժանահավատ է թվում:

Հարցազրույցը վարեց Արեգնազ Մանուկյանը