Նախօրեին «Հայ կամավորների համախմբում» ազգային նախաձեռնության համակարգող Ժիրայր Սեֆիլյանը հայտարություն էր արել այն մասին, որ թուրքական պետությունն արդեն ներդրումներ է անում Հայաստանում և, որպես օրինակ, մատնանշել էր Գյումրիի տեքստիլ գործարանը:

Սակայն Շիրակի մարզպետարանի ծրագրերի և սոցիալ-տնտեսական զարգացման բաժնի պետ Մարտին Տոնոյանն առաջին անգամ լսելով այդ հայտարարության մասին՝ անակնկալի եկավ և ծիծաղելի համարեց. «Տեքստիլ գործարանում ի՞նչ են անում, կամ էնտեղ ի՞նչ կա, որ ներդրում անեն. մենակ պատերն են: Եթե մանվածքայինի համար ասեր, էլի խելքին մոտ կլիներ: Ոչ մի թուրք էլ չկա»։

Իսկ «7օր»-ի այն հարցին, թե միգուցե մարզի  այլ ընկերություններում են թուրքերը ներդրումներ անում, Մարտին Տոնոյանը պատասխանել է. «Տո թուրքն ո՞վ է, որ էստեղ ներդրում անի: Դա պրովոկացիա է. այդ համաձայնագիրը ստորագրելուց հետո ինչ հայտարարություն ասես, որ չեն անում,- այնուհետև ավելացրել,-չնայած, եթե ներդնում են, թող ներդնեն. շատ էլ հաճելի աշախատատեղեր կբացվեն: Ի՞նչ կապ ունի, թե ով է ներդնում. հարևան պետություն են։ Հիմա բոլորն են ասում, որ հարևանների հետ լավ հարաբերությունների մեջ պիտի լինենք»:

Դերենիկ Մալխասյան

Գյումրի