Թուրքիայի Դեմոկրատական կուսակցության ղեկավար Հուսամեդդին Ջինդորուկն իր վերաբերմունքն  է հայտնել Հայաստանի և Թուրքիայի միջև նախաստորագրված արձանագրությունների վերաբերյալ։

Ինչպես տեղեկացնում է «АПА» գործակալությունը, հղում անելով «Habertürk»-ին, Հուսամեդդին Ջինդորուկն ասել է, որ կառավարությունն այդ քայլերը ձեռնարկել է ԱՄՆ-ի կարգադրությամբ։

-Թուրքիայի խորհրդարանում Բարաք Օբամայի ելույթում մի պարբերություն կա, որը չի կարելի ուղղակի խորհուրդ համարել։ Այժմյան իրավիճակն այդ պարբերության շարունակությունն է,- ասել է նա։

Նա հայտնել է, որ ինքն ուսումնասիրել է արձանագրությունները, և դրանք այդ տեսքով չեն կարող քննարկվել խորհրդարանում։ Նրա կարծիքով միջպետական համաձայնագիրը չպետք է  պայմաններ պարունակի, և խորհրդարանի իրավաբանները պետք է ուսումնասիրեն այդ փաստաթուղթը։

Հ. Ջինդորուկը նշել է, որ հայ-թուրքական հարաբերությունները ոչ թե երկկողմանի են, այլ եռակողմ։

-Եթե Թուրքիան ցանկանում է լուծել Հայաստանի հետ ունեցած խնդիրները, ապա այդ գործընթացին անպայման պետք է մասնակցի Ադրբեջանը։ Մենք չենք կարող անհարգալից վերաբերվել Ադրբեջանին՝ մի պետության, որի հետ ունենք մի լեզու, մի հավատք և նույն արմատները,- ասել է խորհրդարանի նախկին ղեկավարը։

Նա նաև ասել է, որ Հայաստանի հետ հարաբերություններում չկան այնպիսի հարցեր, որոնք պետք է հրատապ լուծել.

-Ի՞նչ կպատահի, եթե Հայաստանի նախագահը չգա Բուրս՝ ֆուտբոլային հանդիպմանը։ Եթե նա գա, խաղը կսկսվի նրա հարվածո՞վ, թե՞ նա է դատելու խաղը։ Մենք չպետք է սխալ քայլեր անենք միայն նրա համար, որ Հայաստանի նախագահը ժամանի Թուրքիա։