Ինչպես արդեն տեղեկացրել էինք, երեկ ինքնակամ դատախազության նախաքննական մարմին է ներկայացել հետախուզման մեջ գտնվող ԱԺ պատգամավոր Խաչատուր Սուքիասյանը։ «7օր»-ի հետ զրույցում Խ. Սուքիասյանի փաստաբան Արթուր Գրիգորյանն ասել է, որ Սուքիասյանը գտնվում է Երևան Կենտրոն համայնքի քրեակատարողական հիմնարկում։

-Պարոն Սուքիասյանը քրեորեն հետապնդելի որևէ արարք չի կատարել։ Այնուհանդերձ, քրեական հետապնդում կար այսքան ժամանակ, և պարոն Սուքիասյանը որոշեց ներկայանալ և իր անմեղությունը  հաստատել՝ վիճարկել իրեն ներկայացված քրեական մեղեադրանքը,-ասել է փաստաբանը։

Այն հարցին, թե չէ՞ որ Խաչատուր Սուքիասյանը հայտարարել էր, որ չի ներկայանա, Արթուր Գրիգորյանը պատասխանել է, որ նա ընդամենը ասել է, որ կներկայանա այն ժամանակ, երբ ցանկանա։

-Նա ասել է, որ կներկայանա՝ երբ որ ինքը կցանականա, այլ ոչ  թե այնպես, որ փորձում էին իշխանությունները՝   համաներում կիրառելու ակնկալիքով, որը Պարոն Սուքիասյանի համար տարբերակ չէր ներկայանալու, և այստեղ գխավոր դերը պիտի խաղար իր կամարտահայտությունը, երբ ինքը կցանկանար իրականացնել, և նա ցանկացավ իրականացնել հիմա,-հավելել է նա։

Փաստաբանը նաև նշել է, որ սեպտեմբերի երկուսի՝ ժամը 14։50-ից սկսած, քննչական մարմինը 72 ժամ ունի դատարան դիմելու և Խաչատուր Սուքիասյանին կալանավորելու պահանջ ներկայացնելու համար, այլապես, ըստ օրենքի, նա ենթակա է անհապաղ ազատ արձակման։

-Ինչ վերաբերում է մեղադրանքին, ապա, եթե գործը նախաքննությամբ չկարճվեց,  դատարանում պիտի քննվի Խաչատուր Սուքիասյանի մեղավորության հարցը,-նշել է Արթուր Գրիգորյանը։

7or.am