iLur.am-ի զրուցակիցն է ԱԺ ԲՀԿ խմբակցության պատգամավոր Ստեփան Մարգարյանը

- Պարո՛ն Մարգարյան, քառյակը հրապարակեց իշխանություններին ուղղված 12–կետանոց պահանջները: Ձեր կարծիքով որքանո՞վ են դրանք իրականանալի:

- Մենք շատ երկար ենք այդ հարցերը քննարկել: Ու մենք հետևյալ սկզբունքն ենք որդեգրել՝ եթե մի բան ենք ասում և պահանջում Կառավարությունից, նշանակում է՝ մենք ինքներս պատկերացնում ենք, թե ոնց պիտի դրանք անել: Այդ կետերում չկա մի հարց, որի իրականացումն ինքներս չպատկերացնենք, որոնց լուծումները ինքներս չունենանք: Եթե Կառավարությունը չիրագործի այդ կետերը, նշանակում է՝ կա՛մ չի կարող, կա՛մ չի ուզում: Իսկ մեզ համար այդ կետերն իրատեսական են ու հնարավոր:
- Ձեր կարծիքով իշխանությունները կգնա՞ն այդ կետերի իրականացմանը, թե՞ ոչ:
- Չեմ ուզում գուշակություն անել: Բայց վստահ եմ մի հարցում՝ առանց այդ կետերը կատարելու՝ անհնար է պատկերացնել մեր երկրի ապագան: Այնպես չի, որ մենք այդ կետերը հրապարակել ենք սպորտային հետաքրքրությունից ելնելով: Այդ 12 պահանջներում ամրագրված են մեր երկրի առաջ ծառացած այն մարտահրավերները, որոնք եթե չլուծվեն, մենք շատ ու շատ բնագավառներում կունենանք փլուզում՝ բառի բուն իմաստով: Կունենանք փլուզում տնտեսության և քաղաքական ասպարեզում:

- Եթե իշխանությունները չկատարեն այդ պահանջները կամ կիսաքայլեր անեն՝ ձևացնելով, թե «գործ են անում», ի՞նչ է անելու քառյակը:
- Ես չեմ ուզում նախապես խոսել այդ մասին: Մենք հրապարակել ենք մեր պահանջները և ուզում ենք, որ իշխանությունները գնան դրանք կատարելու ճանապարհով: Եթե չգնան, ապա մենք, անշուշտ, լուծումներ ենք փնտրելու, մենք համարելու ենք, որ երկիրը փրկելու խնդիր կա: Բայց ես հուսով եմ, որ նրանք կգնան այդ քայլերին:

- Ինչո՞ւ եք իշխանությունների մասին այդքան լավ կարծիքի, ինչո՞ւ եք այդքան լավատես:

- Դա լավատեսություն չէ: Պարզապես, այսօր իրավիճակն այնպիսին է, որ ստիպում է լուծումներ գտնել: Իսկ եթե նրանք չեն գտնի համապատասխան լուծումներ, կփլուզվի երկիրը: Այսօր հասել ենք հենց այդ վիճակին:
- Ի դեպ, Ձեր խմբակցության քարտուղար Նաիրա Զոհրաբյանը, պատասխանելով իշխանափոխության գնալու և Սերժ Սարգսյանի հրաժարականը պահանջելու մասին հարցին, քառյակի ասուլիսում հայտարարեց, որ ԲՀԿ-ի համար չկան տաբու թեմաներ, և եթե իշխանությունները չկատարեն 12 պահանջները, իրենք չորս ուժերով, ժողովրդի հետ կորոշեն անելիքները:
- Անշուշտ, չկան տաբու թեմաներ: Մենք ցանկացած հարց պատրաստ ենք բարձրացնել: Բայց հիմիկվանից ասել, որ իշխանությունները չեն անի այդ քայլերը, նշանակում է՝ մենք մտածում ենք՝ «ասենք այնպիսի բան, որ նրանք չանեն»: Ոչ, այդպես չէ: Այսօր մեր նպատակն է, որ իրականացվեն հրապարակված 12 քայլերը: Մենք իսկապես ուզում ենք, որ երկիրն առաջ գնա, իսկ դրա համար անհրաժեշտ է իրականացնել այս առաջնային քայլերը: Իսկ եթե այդ քայլերը չարվեն, մենք պետք է մտածենք մեր անելիքների մասին:

- Եթե իշխանությունները չկատարեն այս կետերը, արդյոք իշխանափոխություն կհասունանա՞:

- Ես կարծում եմ՝ այո: Եթե այս 12 կետերը չարվեն, իմ կարծիքով մենք շատ լուրջ, արմատական լուծումների գնալու անհրաժեշտության առաջ ենք կանգնում:

Արման Գալոյան