Լրագրողների հետ հանդիպման ժամանակ երգչուհի Նառան, Գայանե Հովհաննիսյանը, Անչոկը, երաժիշտ Արմեն Գևորգյանը, Կոմիտասի անվան Երևանի պետական կոնսերվատորիայի դասախոս, դոցենտ Արմանուշ Հակոբյանը դեմ են արտահայտվելերաժիշտ Ակսել Բակունցի տնօրինությամբ գործող Երևանի էստրադային և ջազային արվեստի պետական քոլեջը երգչուհի Նադեժդա Սարգսյանի տնօրինությամբ գործող Երևանի մշակույթի պետական քոլեջին միացնելու ՀՀ կառավարության որոշմանը և նշել են, թե իրենք հույս ունեն, որ կառավարությունը հաշվի կառնի իրենց կարծիքն ու կվերանայի իր որոշումը։

- Այսօրվա մեր ուսանողներին հարցրե՞լ են, թե արդյոք իրենք ուզո՞ւմ են միավորվել։ Ինչո՞ւ են առանց որևէ մեկին հարցնելու նման որոշումներ կայացնում,-ասել է երաժիշտ Արմեն Գևորգյանը։

«7օր»-ի հարցին, թե կարելի՞ է ասել, որ կառավարությունն ու մշակույթի նախարարությունն անտեղյակ են իրենց ենթակայության տակ գործող կառույցներից,  դրա համար էլ նման իրավիճակ է ստեղծվել, երգչուհի Նառան պատասխանել է.

-Ձեր հարցի մեջ նաև կար պատասխանը։

Իսկ թե ի՞նչ են անելու իրենք, եթե կառավարությունը, այնուամենայնիվ, ետ չկանգնի իր որոշումից, երգչուհին նշել է, թե ինքը դեռ հույսով է ապրում ու ցույցերին այլընտրանք՝ առաջարկեց բողոքի համերգ կազմակերպել։

Երգչուհի Գայանե Հովհաննիսյանն էլ ասել է, թե առաջարկում է անվանի երգիչներով գնալ ուղիղ վարչապետի մոտ և անձամբ ներկայացնել իրենց տեսակետն ու պահանջը։

 Կոմիտասի անվան Երևանի պետական կոնսերվատորիայի դասախոս, դոցենտ Արմանուշ Հակոբյանն  էլ նշել  է, որ եթե կառավարությունում իրենց չլսեն,  կգնան նախագահի մոտ։

7or.am