Փետրվարի 9–ի՝ լույս 10–ի գիշերը ոստիկանական բաժին բերման են ենթարկել Հայ ազգային կոնգրեսի ակտիվիստներ Արեգ Գևորգյանին, Սարգիս Գևորգյանին, Հայկ Պետրոսյանին, Դավիդ Վարդանյանին, Անդրանիկ Դավթյանին, Թաթուլ Սարոյանին, Տաթևիկ Պողպատյանին, Կարեն Հակոբյանին և Վարդան Հարությունյանին, ովքեր փորձել են իրազեկել մարտի 1–ին նախանշված հանրահավաքի մասին։

«7օր»–ի հետ զրույցում Տաթևիկ Պողպատյանը պատմել է, որ գիշերը՝ ժամը 2։40–ի սահմաններում, Սարյան–Մաշտոցի պողոտայի խաչմերուկում իրեն և Թաթուլ Սարոյանին են մոտեցել քաղաքացիական հագուստով անձինք և պարեկապահակային ծառայության ոստիկանները ու տարել ոստիկանական բաժանմունք։

–Դեռ գրեթե ոչ մի թռուցիկ չէինք հասցրել փակցնել, մոտեցան, առանց ներկայանալու ու բացատրության՝ նստացրեցին ոստիկանական մեքենան և տարան բաժին։ Վախենում էին մայրաքաղաքով Սերժ Սարգսյանի նկարը տարածվելուց։ Զգալով մարտի 1–ի հանրահավաքի կարևորությունը՝ ռեժիմն անցել է կոշտ մեթոդների։ Սրանով ցույց են տալիս, որ Սերժ Սարգսյանը խուճապի է մատնված,–ասել է Տ. Պողպատյանը։

Կոնգրեսի մյուս ակտիվիտներին էլ բերման են ենթարկել Ամիրյան փողոցից։ Ոստիկանությունում ասել են, որ նրանց ենթարկել են վարչական ձերբակալության:

7or.am