ՀՅԴ խմբակցության ղեկավար Արմեն Ռուստամյանը չի հավատում խորհրդարանական մեծամասնության անկեղծությանը, թե գազի պայմանագրի ուսումնասիրման ժամանակավոր հանձնաժողով ստեղեծելու ԱԺ ոչիշխանական 4 խմբակցությունների առաջարկը լավ կլիներ՝ նախապես քննարկվեր իրենց ու ԱԺ նախագահի հետ։ Ու ընդհանրապես, քաղաքական մեծամասնության պահվածքը Ռուստամյանին դեժավյու է հիշեցնում. 4 տարի առաջ էլ ՀՅԴ–ն առաջարկել էր գազամատակարարման հարցն ուսումնասիրող ժամանակավոր հանձնաժողով ստեղծել, և այն ժամանակ էլ մեծամասնությունն ասում էր՝ իրեն նախապե՛ս պետք է տեղյակ պահեին։

–Այն ժամանակ ասում էիք՝ եթե այդ հանձնաժողովի անհրաժեշտությունը լիներ, մեծամասնությունը կստեղծեր: Սա մի անեկդոտ է հիշեցնում. «Մի քաղաքացի իջնում է ավտոբուսից, վարորդը հարցնում է՝ տոմսդ ո՞ւր է, ասում է՝ ի՞նչ տոմս, ես ավտոբուսից չեմ իջել: Եթե ավտոբուս եմ նստել, ուրեմն պետք է տոմս ունենայի, չէ՞։ Եթե տոմս չունեմ, ուրեմն ավտոբուսից չեմ իջել,-պատմել է ՀՅԴ խմբակցության ղեկավարը։

Ստեղծված իրավիճակի պատճառն Ա. Ռուստամյանը համարում է այն, որ ոչ մի պետական իշխանական մարմին չի իրականացնում Սահմանադրությամբ իրեն վերապահված լիազորությունները։

–Իշխանությունները չեն ձերբազատվում իշխանությունն ամեն գնով պահելու իրենց ձգտումից: Ահա թե ինչու սուսուփուս, գաղտագողի այս գործընթացները համընկան խորհրդարանական ու նախագահական ընտրությունների հետ: Հիմա մեզ ստիպում են մի կապիտուլյացիոն պայմանագիր, որի նմանն աշխարհում չկա: Իշխանությունները թաքուն պահելու գինն են վճարում, բայց վճարում են ժողովրդի հաշվին։ Իշխանություններն իրենց հավերժ ընթացքն ապահովելու համար կողքի են դրել երկրի անվտանգությունը,–նշել է Ա. Ռուստամյանը:

7or.am