ՀՀԿ խմբակցության ղեկավար Գալուստ Սահակյանը ԱԺ–ում լրագրողներին տեղեկացրել է, որ ՀՀԿ-ն դեմ է քվեարկելու գազի հարցով ժամանակավոր հանձնաժողով ստեղծելու ոչիշխանական 4 խմբակցությունների առաջարկին։

Գ. Սահակյանն ասել է, որ ՀՀԿ–ի համար այդ առաջարկն ընդունելի չէ։

–Նման որոշումները սովորաբար նախ պիտի քննարկվեն ներսում, համապատասխան հանձնաժողովում, պիտի կազմակերպել լսումներ, նոր բերել: Մի օրվա մեջ մենք պիտի որոշենք, թե ի՞նչ ենք անում։ Այստեղ ամեն ինչ անորոշ է՝ փաստաթղթեր ուզենք, պաշտոնատար անձեր կանչենք, հասարակական կազմակերպություններ կանչենք, քննարկենք: Ի՞նչը քննարկենք,-ասել է Գ. Սահակյանը:

Նա նաև ավելացրել է, որ ՀՀ կառավարությունը շատ հանգիստ կարող էր գազի պայմանագրերը Ազգային ժողով չբերել էլ, քանի որ այն օտարման ցանկում կար, բայց հասարակական հնչեղության պատճառով, բերել է.

–Ենթադրենք էս հանձնաժողովն ստեղծեցինք, ստեղծեցինք նաև մազութի հանձնաժողովը, արդյունքները ի՞նչ են: Մեզ համար ընդունելի չէ։

Փոխարենը, ՀՀ ԱԺ նախագահ Հովիկ Աբրահամյանը հայտարարել է, որ իրենք ևս կողմնակից են, որ գազի պայմանագրի հետ կապված փաստթաթղթերը բացեն և ուսումնասիրեն։

–Խոսք եմ տալիս, որ մենք ապագայում այդ հարցին անդրադառնալու ենք,–ընդգծել է Հ. Աբրահամյանը՝ միայն թե չհստակեցնելով, թե այդ ապագան ինչ ժամկետներ է ենթադրում։

7or.am