«Հայկական վերածնունդ» կազմակերպության Պրահայի մասնաճյուղի անդամ Բագրատ Առաքելյանը, որը նաեւ տրամադրել է տեսանյութը, iLur.am-ին տեղեկացրեց հունվարի 31-ին տեղի հայ համայնքի ներկայացուցիչների հետ Սերժ Սարգսյանի ունեցած հանդիպման որոշ մանրամասների մասին:

Նախ, Սարգսյանի անվտանգության աշխատակիցները պահանջել են դահլիճից հեռացնել բոլոր տեսանկարահանող սարքերը` թողնելով միայն Ս. Սարգսյանի աշխատակազմի լրատվական ծառայության տեսախցիկները:

Հանդիպման մասնակիցներից լրագրող, տարիներ առաջ Չեխիայում բնակություն հաստատած Շուշան Ղազարյանը հարց է ուղղել Սարգսյանին արտասահմանում բնակվող ՀՀ քաղաքացիների ընտրության իրավունքի վերականգնման վերաբերյալ: Սերժ Սարգսյանն ի պատասխան նշել է, որ «դա շատ դժվար է անել եւ անիմաստ»: «Հայերը շատ են եւ ամենուր, մենք հո չենք կարող, ասենք, Ռուսաստանի Վլադիվոստոկ քաղաքի հայերի համար ընտրատարածք բացել»,- ասել է նա: (Սովորաբար արտերկրում բնակվող քաղաքացիների համար ընտրատարածքներ են բացվում տվյալ երկրի դիվանագիտական կամ հյուպատոսական ներկայացուցչություններում– խմբ.):

Պրահայի հայկական դպրոցի ուսուցչուհի Լարիսա Գրիգորյանը հիշեցրել է Շառլ Ազնավուրի հայտնի մտահոգության մասին, որ Հայաստանը դատարկվում է մի քանի մաֆիոզների պատճառով: Ի պատասխան, Սարգսյանը նշել է, թե «Ազնավուրը լավ երգիչ է, բայց Հայաստանի իրականությանը ծանոթ չէ»: (Շառլ Ազնավուրը Սերժ Սարգսյանի հրամանով արդեն շուրջ վեց տարի զբաղեցնում է Շվեյցարիայում ՀՀ դեսպանի պաշտոնը):

Մանրամասները՝ ilur.am–ում։