Գերմանիայի կանցլեր Անգելա Մերկելը հայտարարել է, որ Ուկրաինան ԵՄ–ի հետ Ազատ առևտրի գոտու պայմանագրի ստորագրման ժամկետների մեջ սահմանափակված չէ, բայց միաժամանակ անդամակցել երկու Մաքսային միության չի կարող։ gazeta.ru-ն, УНИАН–ին հղումով, գրում է, որ այս հայտարարությունը հնչել է Բրյուսելում ԵՄ գագաթաժողովի ավարտին։

Հարցին՝ Ուկրաինայի հնարավոր անդամակցությունը ՄՄ–ին հակասո՞ւմ է ԵՄ–ի հետ Ազատ առևտրի գոտուն անդամակցությանը, Մերկելը պատասխանել է. «Ուկրաինան չի կարող ստորագրել համաձայնությունը Մաքսային միության երկրների հետ և միաժամանակ Ազատ առևտրի գոտի ստեղծել ԵՄ–ի հետ»։

Այդուհանդերձ, Մերկելը հավելել է. «Դուռը բաց է մնում։ Ոչ մի ժամկետ, երբ այն կփակվի, չկա։ Մենք ուզում ենք կնքել այդ համաձայնագիրը. Եվրոպան պատրաստվել է դրան։ Հիմա որոշումը պետք է ընդունի Ուկրաինան»։

Ավելի վաղ Ուկրաինայի վարչապետ Նիկոլայ Ազարովը հայտարարել էր, որ ասոցացման պայմանագիր Եվրամիության հետ կարող էր ստորագրվել, եթե Ուկրաինային 20 մլրդ դոլարի չափով օգնություն տրամադրվեր։