Ֆրանսիական զինված ուժերը հասարակական կարգի վերականգնման գործողության են անցել Կենտրոնական Աֆրիկայի Հանրապետությունում (ԿԱՀ)։

«Ռազմական գործողությունը սկսված է, ֆրանսիացի զինվորները երեկ երեկոյից վերահսկում են մայրաքաղաք Բանգիի օդանավակայանը», – հայտարարել է Ֆրանսիայի պաշտպանության նախարար Ժան–Իվ Լե Դրիանը։ Այս մասին տեղեկացնում է news.ru-ն։ Նա հավելել է, որ այսօր օդանավակայանում վայրէջք կկատարեն Ֆրանսիայի ռազմաօդային ուժերը։ Ավելի վաղ նախարարը տեղեկացրել է, որ Ֆրանսիան ծրագրել է հազար զինվոր ուղարկել ԿԱՀ վեց ամիս ժամկետով։ Հինգշաբթի գիշերը երկրում բախումներ են սկսվել ինքնահռչակված նախագահ Միշել Ջոթոնիի զինյալների և նրա վարչակարգի դեմ հանդես եկողների միջև։ Մահացածների թիվն ավելի քան 100 մարդ է։ Պետք է նշել, որ ԿԱՀ–ի հիմնական բնակչությունը քրիստոնյա է, իսկ Միշել Ջոթոնին մահմեդական է։ Ֆրանսիայի նախագահ Ֆ. Օլանդի խոսքերով՝ Փարիզի միակ նպատակը «մարդկային կյանքերի փրկությունն» է։