«Ժառանգություն» խմբակցության անդամ Ստեփան Սաֆարյանը «7օր»-ին է ներկայացրել Հելսինկյան խորհրդատվությունների եզրափակիչ հանձնարարականների 79-րդ պարագրաֆի գլուխ 6-ի վերաբերյալ՝ Րաֆֆի Հովհաննիսյանի ելույթը։

-Սա այն նույն փաստաթղթի վերաբերյալ է, որը մատնանշում է Գալուստ Սահակյանը,-շեշտել է նա և ներկայացրել ելույթը։

«1-ին կետ. Այս ժուռնալի որոշման 5-րդ խնդրի ներքո Հայաստանի պատվիրակությունը հանդես է գալիս հետևյալ հայտարարությամբ.

Հայաստանը տարածքային վեճ չունի Ադրբեջանի հետ։

2-րդ պարագրաֆ. ՀՀ կառավարությունը համարում է, որ ԼՂ հարցը պետք է լուծվի մարդու իրավունքների հարգման և ժողովուրդների ինքնորոշման սկզբունքներին համապատասխան, որոնք Հելսինկիի համապատասխան ակտի համապատասխան սկզբունքներից են։

3-րդ պարագրաֆ. Հայաստանը, իբրև շահագրգիռ երկրորդ կողմ, համարում և գտնում է, որ բանակցությունների բացումը Լեռնային Ղարաբաղի ժողովրդավարական սկզբունքներով ընտրված իշխանությունների ներկայացուցիչների և Ադրբեջանի կառավարության ներկայացուցիչների միջև միակ ճանապարհն է՝ այս հիմնախնդրի լուծման։ Հայաստանը կօժանդակի այս առումով այն նախաձեռնություններին, որոնք միտված են այդպիսի երկխոսության հաստատմանը և կանի ցանկացած ջանք՝ բանակցությունների հաջողությունն ապահովելու համար»։

Ըստ Ստեփան Սաֆարյանի՝ իրենց կուսակցության համար հարց է մնում, թե ինչո՞վ էր զբաղված այդ տարիներին Գալուստ Սահակյանը։

-Քաղաքականապես և անձնապես որտե՞ղ է եղել և ինչո՞վ է զբաղվել այդ տարիներին Գալուստ Սահակյանը, երբ տեղյակ չէ, թե ՀՀ առաջին արտգործնախարարն ինչ հայանպաստ և արցախանպաստ գործունեություն է ծավալում միջազգային բեմահարթակներում,-ասել է Ստեփան Սաֆարյանը։ 

7or.am