Այսօր լրագրողների հետ հանդիպմանը խոսելով Լեռնային Ղարաբաղի սահմանի լարվածության մասին՝ քաղաքագետ Մանվել Սարգսյանն ասել է, թե այդ միջադեպերը Ադրբեջանի կողմից օդտագործվում են որպես դիվանագիտական գործընթացի վրա ճնշում գործադրելու միջոց։

-Ադրբեջանն ամեն կերպ փորձում է իր թեզը հաստատել, թե պատերազմը դեռ չի վերջացել և ամեն պահի կարող է վերսկսվել,-ասել է քաղաքագետը։

Իսկ քաղաքագետ Սերգեյ Մինասյանը, համաձայնելով իր գործընկերոջ հետ, ադրբեջանական կողմի սպառնալիքները համարել է պարզապես  «ռազմական շանտաժ», որը Ադրբեջանն օգտագործում է Հայաստանի և միջազգային հանրության դեմ՝ բանակցային գործընթացում զիջումներ ստանալու նպատակով, քանի որ դա միակ ռեսուրսն է, որը մնացել է Ադրբեջանի ձեռքում։

-Այն ռազմական սպառնալիքների աստիճաը, որը Ալիևը և Ադրբեջանի ռազմական քաղաքական ղեկավարությունն օգտագործել են մինչև անցած տարվա Ալմաթիի գագաթնաժողովը, և այն, որ պատերազմ չսկսվեց, խոսում է նրա մասին, որ նույնիսկ այդ ռազմական շանտաժի մեխանիզմն արդեն Ադրբեջանը սպառում է, որովհետև նմանատիպ հայտարարություններից հետո առնվազն իրեն հարգող պետության ղեկավարը պիտի սկսեր պատերազմ,-ասել է քաղաքագետ Սերգեյ Մինասյանը՝ հավելելով, թե առաջիկայում պատերազմի վերսկսում չի նախատեսում, քանի որ Ադրբեջանը հասկանում է դրանից բխող բոլոր վտանգավոր հետևանքները։