Հարցազրույց Երևանի ավանագու ընտրությունների ՀԱԿ ցուցակում ընդգրկված թեկնածու, մարքեթինգի ու հանրային հարաբերությունների մասնագետ Արամազդ Ղալամքարյանի հետ

–Քաղաքական իմաստով որքանո՞վ են կարևոր մայիսի 5–ին կայանալիք Երևանի ավագանու ընտրությունները։ ՀՀԿ–ն այն ներկայացնում է որպես զուտ քաղաքային ընտրություն։ Ո՞րն է այստեղ քաղաքական տարրը։

–Երևանի ավագանու ընտրությունը քաղաքական առումով ունի երկակի կարևորություն․ նախ, ընտրությունը ոչ թե անձանց, այլ քաղաքական կուսակցությունների միջև է, և երկրորդ՝ այս ընտրությունը միջոց է՝ փոխելու երկրում քաղաքական դաշտն ու իրականությունը, ստանձնելու քաղաքական պատասխանատվություն: Այս առումով՝ քաղաքական նոր իշխանության ձևավորումը, թեկուզ Երևանի մասշտաբով, հսկայական նշանակություն է ունենալու ողջ Հայաստանի, յուրաքանչյուր հայաստանցու համար:

–Ինչպե՞ս է տրամադրված երևանցին ընդդիմադիր ուժերի և ՀՀԿ–ի նմատմամբ։ Եվ արդյոք սկսե՞լ է գիտակցել, որ իր քվեն իրոք արժեք ունի, և իր մի ձայնով կարող է շատ բան փոխել։

–Քարոզարշավը թափ է հավաքում, Հայ ազգային կոնգրեսի ցուցակը, այդ ցուցակի ոգին ու տրամաբանությունը, ցուցակում ընդգրկված երիտասարդ կազմը, քաղաքապետի մեր թեկնածուն օրեցօր ավելի ճանաչված են դառնում, գրավում երևանցու ուշադրությունն ու հետաքրքրություն առաջացնում: Մասնավորապես՝ սրան նպաստեց նաև ՀԱԿ համագումարը: Իմ շրջապատում կան մարդիկ, ովքեր երբեք ՀԱԿ-ի համակիր չեն եղել, բայց այս օրերին մոտենում են ինձ ու կիսվում երկրում շրջադարձային փոփոխություն տեսնելու իրենց հույսերով ու ակնկալիքներով: Ու ասեմ ձեզ՝ այդ մարդկանց միակ հույսը, ըստ իրենց, Հայ ազգային կոնգրեսն է: Ես նման երևույթի վերջին անգամ բախվել եմ 2008-ի նախընտրական շրջանում: Սա, մի կողմից, հույս է ներշնչում, մյուս կողմից՝ պատասխանատվություն դնում մեր ուսերին:

–«Տարոն Մարգարյանին սիրում են»,–այս նախադասությունը բոլոր ՀՀԿ–ականները միաբերան կրկնում են։ Քարոզարշավն ի՞նչ է ցույց տալիս, իրո՞ք այդպես է։

–Գիտե՞ք ինչ, ես հարկեր եմ վճարում ոչ թե այն բանի համար, որ սիրելի անձնավորություն ունենամ քաղաքապետարանում, այլ որ ապրեմ հարմարավետ, մաքուր, կանաչ, առողջ, զարգացող քաղաքում: Ինձ, որպես քաղաքացու, պետք է ունենալ թափանցիկ ու հաշվետու քաղաքապետարան, այլ ոչ թե սիրո օբյեկտ: Մյուս կողմից՝ նույնիսկ այդ փչոցին կհավատայի, եթե հասկանայի, թե հանուն ինչի պետք է սիրեն Տարոնին: Այն բանի համար, որ անհայտ եղանակով դարձել է միլիոնատե՞ր: Դե թող դրա ձևը մեզ էլ ասի, լա՞վ: Կամ՝ այն բանի համար, որ բանակում չի ծառայել, բայց պարգևատրվել է Երկրապահների միության մեդալո՞վ: Թե՞ որ քաղաքը ողողել էր անճաշակության գագաթնակետ լուսատու կենդանիներով ու «ծառերով»: Թե՞ այն բանի համար, որ քաղաքի կենտրոնում ավերում են «Ծածկած շուկան», իսկ ինքը խոշոր բիզնեսի դեմ անօգնական է: Ասացեք՝ ինչո՞վ պետք է նա արժանանար սիրո:

–Ավագանու ընտրություններում ընդդիմադիր այլ ուժերի հետ համագործակցությունը ի՞նչ բնույթի կարող է լինել։ Հնարավո՞ր է, որ ավագանիում ընդդիմադիր ուժերը կոալիցիա կազմեն և նշանակեն ընդդիմադիր քաղաքապետի։

–Ես այդ համագործակցությունը կբաժանեի երեք մասի՝ նախքան քվեարկության օրը, քվեարկության օրվա ընթացքում և քվեարկությանը հաջորդող շրջանում: Բոլոր երեք փուլերում էլ տեսնում եմ իրական համագործակցության հնարավորություն: Ավելին՝ այդ համագործակցության իրացման աստիճանն ինքնին ընտրողին կհուշի, թե ով ով է քաղաքական դաշտում:

Հարցազրույցը վարեց Արեգնազ Մանուկյանը