Այսօր շատերի համար անակնկալ կերպով «Ժառանգություն» կուսակցության նախագահ Րաֆֆի Հովհաննիսյանը կնոջ և որդու հետ մեկնել է Մոսկվա։ Նրա կողմնակիցները սկզբից հրաժարվում էին մեկնաբանություններ տալ, թե ինչո՞ւ է Րաֆֆի Հովհաննիսյանը գնացել այնտեղ, «Ժառանգության» մամուլի խոսնակն էլ նշել էր միայն, թե այցը մեկօրյա է և մասնավոր։

Քիչ ավել ուշ «Ժառանգություն» կուսակցության գլխավոր քարտուղար Ստյոպա Սաֆարյանը «Aravot.am-ին» ասել էր, թե Մոսկվա մեկնելը եղել է ոչ թե Րաֆֆի Հովհաննիսյանի նախաձեռնությամբ, այլ հենց պաշտոնական Մոսկվայի հրավերով:

Այս տեղեկությունը ճշտելու համար «7օր»–ը կապ է հաստատել ՌԴ նախագահ Վլադիմիր Պուտինի մամուլի ծառայության հետ։ Այնտեղից դժվարացել են մեզ պատասխանել՝ ՌԴ նախագահի և Րաֆֆի Հովհաննիսյանի հանդիպում նախատեսվա՞ծ է։

–Մենք մեկնաբանություններ չենք կարող տալ, քանի որ մեր մամուլի խոսնակը գործուղման մեջ է և մոտակա ժամերին՝ հավանաբար առաջիկա 2 ժամվա ընթացքում, հաստատ չի կարող ձեզ հետ խոսել։ Կարող ենք ասել միայն, որ այսօր պետխորհրդի նիստ է նախատեսված  Ուլան–Ուդեում, և ավանդաբար այն վարում է նախագահը,–մեզ հետ զրույցում ասել են Վ. Պուտինի մամուլի ծառայությունից։

ՌԴ ԱԳՆ–ից խոստացել են մեր հարցին պատասխանել գրավոր։ «7օր»–ը նույն տեղեկատվության պարզաբանման խնդրանքով գրավոր հարցում է ուղարկել նաև ՌԴ կառավարություն։ Լրացուցիչ տեղեկությունների մասին կհաղորդենք ավելի ուշ։

Նշենք նաև, որ ՌԴ նախագահի պաշտոնական կայքում (kremlin.ru) Րաֆֆի Հովհաննիսյանի հետ նախատեսվելիք հանդիպման մասին որևէ գրառում չկա։

7or.am