«Նարեկացի» արվեստի միությունում տեղի ունեցավ վոկալ երաժշտության համերգ`  նվիրված Ս. Ռախմանինովի 140-ամյակին:

 Համերգից առաջ  Երևանի Կոմիտասի անվան  պետական կոնսերվատորիայի Գյումրիի   մասնաճյուղի դասախոս`  Սոնա Զառաֆյանը  մի քանի խոսքով հանդիսատեսին ներկայացրեց   Ս. Ռախմանինովի   կյանքն  ու ստեղծագործությունը, նրա  արվեստի ոճային առանձնահատկությունները:     

Ս. Ռախմանինովի ստեղծագործություններով  հանդես  եկավ  օպերային  երգչուհի, սոպրանո` Արևիկ Գրիգորյանը`  Արփինե Խլղաթյանի դաշնամուրային նվագակցությամբ:

Արևիկ Գրիգորյանը  2007թ.-ից երգում է «Գոհար» երգչախմբում, Գյումրիի Սբ. Աստվածածին եկեղեցու մեներգչուհին է, դասավանդում է տեղի  Խ. Ավետիսյանի անվան թիվ  72 երաժշտական դպրոցում: 2012թ.` «Անուշ» օպերայի 100-ամյակին, Գյումրիի Վ. Աճեմյանի անվան դրամատիկական թատրոնում հանդես է եկել Անուշի դերերգով:  

Համերգի կազմակերպիչն ու Արևիկ Գրիգորյանի պրոդյուսեր Վիգեն Թանաշյանը ընդամենը մի քանի ամիս է, ինչ ստանձնել  է երգչուհու արվեստը ներկայացնելու գործը, սակայն   այսօր   արդեն  ակտիվորեն զբաղվում է Արևիկի կայքէջի, առաջին ձայնասկավառակի հրատարակության և համերգային ծրագրերով:  Արևիկի հաջորդ` Հայոց ցեղասպանությանը նվիրված համերգը  նախատեսվում է ապրիլի 23-ին` «Նարեկացի» արվեստի միությունում, իսկ  հուլիսին Գյումրիի Վ. Աճեմյանի անվան դրամատիկական  թատրոնի շենքում  Արևիկ Գրիգորյանը կունենա  մեծ մենահամերգ` սիմֆոնիկ նվագախմբի ընկերակցությամբ:

                                               «Նարեկացի» արվեստի միություն