ԱԺ ՀԱԿ խմբակցության պատգամավոր Լյուդմիլա Սարգսյանն այսօր հրավիրված ասուլիսում ընդգծել է, որ չեն տեսնում Րաֆֆի Հովհաննիսյանի այն տրամաբանական քայլերի շարքը, որը կարող է նպաստել ժողովրդի հաղթանակին:

–Րաֆֆի Հովհաննիսյանի որդեգրած քաղաքականությունը մեզ համար անհասկանալի է: Մենք չենք տեսնում այն տրամաբանական քայլերի շարքը, որով նա կարող է հզորացնել այս շարժումը և նպաստել ժողովրդի հաղթանակին։ Մեծագույն սխալ է, երբ հետընտրական գործընթացները վերածում է նախընտրականի։ Սերժ Սարգսյանի այդ նամակագրությունը և նրան ներկայացված պահանջները իրատեսական չեն: Այն ոլորտները, որ պահանջում է, իշխանությունը երբևէ չի զիջի, որովհետև դրանց վրա հենվելով է կարողանում պահել իր իշխանությունը: Ես դա փոխզիջում չեմ համարում։ Դա վերածվելու է քաղաքական առևտրի,–ասել է Լ. Սարգսյանը։

Նա ավելացրել է, որ Րաֆֆի Հովհաննիսյանի հացադուլն իր նպատակին չի կարողանում ծառայել.

–Անհասկանալի է, երբ Րաֆֆի Հովհաննիսյանը հայտարարում է՝ միայն իր դիակի վրա կարող է անցել երդմնակալությունը: Հետո ասում է՝ ևս ապրիլի 9-ին երդմնակալություն եմ անցկացնելու: Դրանից հետո էլ թե՝ եկեք խոսենք: Ժողովուրդն արտահայտում է մի բան, Րաֆֆի Հովհաննիսյանը՝ մեկ այլ: Մենք` որպես ժողովրդի կողմնակից, չենք կարող համամիտ լինել Րաֆֆի Հովհաննիսյանի շատ քայլերի հետ։ Այն, ինչ որ ակնկալում է ժողովուրդը, Ազատության հրապարակում արդարացված չի լինելու:

7or.am