Մինչ այս ժամը, մայիսի 5–ին կայանալիք Երևանի ավագանու ընտրություններին  մասնակցության հայտ ԿԸՀ է ներկայացրել միայն երեք կուսակցություն՝ ՀԱԿ–ը, ՕԵԿ–ն ու ՀՀԿ–ն։ ԲՀԿ–ն հենց այս պահին է իր փաստաթղթերը հանձնում։

ՕԵԿ-ի համամասնական ցուցակում ընդգրկված է ավագանու 105 թեկնածու, իսկ այն գլխավորում է ՀՀ արտակարգ իրավիճակների նախարար, ՕԵԿ փոխնախագահ Արմեն Երիցյանը։ Նրան հաջորդում են ՕԵԿ վարչության անդամ Հովհաննես Շահինյանը և բանաստեղծուհի, ուսուցչուհի Սոֆյա Արթենյանը:

Երևանի ավագանու ընտրություններին մասնակցելու համար ԿԸՀ իր համամասնական ցուցակն է արդեն ներկայացրել նաև ՀԱԿ–ը։ Այս ցուցակի առաջին տեղը զբաղեցնում է ՀԱԿ կենտրոնական գրասենյակի ներկայացուցիչ, տնտեսագետ Վահագն Խաչատրյանը, երկրորդ տեղը՝ ՀԱԿ ներկայացուցիչ, «Ժողովրդի իշխանություն» նախաձեռնության նախագահ Զոյա Թադևոսյանը, երրորդը՝  ՀԱԿ մամլո խոսնակ Արման Մուսինյանը:

Նախօրեին ԿԸՀ անհրաժեշտ փաստաթղթերն էր ներկայացրել ՀՀԿ–ն, որի համամասնական ցուցակում ընդգրկված է 195 թեկնածու: Առաջին 3 տեղերը զբաղեցնում են Երևանի քաղաքապետ Տարոն Մարգարյանը, Հայաստանի շախմատի ակադեմիայի հիմնադիր-նախագահ, գրոսմայստեր Սմբատ Լպուտյանը, Երևանի ճարտարապետության և շինարարության պետական համալսարանի ռեկտոր Հովհաննես Թոքմաջյանը:

Թեև «Բարգավաճ Հայաստան» կուսակցության ցուցակը դեռ նոր է հանձնվում ԿԸՀ, բայց մարտի 9–ին կայացած ԲՀԿ քաղխորհրդի ընդլայնված նիստում որոշվել էր, որ իրենց համամասնական ցուցակը գլխավորելու է ԲՀԿ պատգամավոր, ՀՀ նախկին արտգործնախարար Վարդան Օսկանյանը։

Հայտնի է նաև, որ ՀՅԴ–ի ցուցակը գլխավորելու է ՀՅԴ խմբակցության ղեկավար Արմեն Ռուստամյանը, խմբակցության քարտուղար Աղվան Վարդանյանը և ՀՅԴ–ական Արսեն Համբարձումյանը։

Ինչ վերաբերում է «Ժառանգությանը», ապա երեկ կուսակցության մամուլի խոսնակը հրաժարվեց իրենց ցուցակի հետ կապված մանրամասներ ներկայացնել՝ ասելով, որ անունները կհրապարակեն ԿԸՀ փաստաթղթերը ներկայացնելուց հետո միայն։

Նշենք, որ այսօր՝ ժամը 18-ին, լրանում է հայտերի ներկայացման վերջնաժամկետը:

7or.am