Այսօր խորհրդարանում պատասխանելով լրագրողների հարցերին՝ ԱԺ «Բարգավաճ Հայաստան» խմբակցության քարտուղար Նաիրա Զոհրաբյանը չի բացառել, որ Երևանի նորընտիր ավագանիում ոչիշխանական ուժերի միջև կոալիցիա կձևավորվի, և հենց վերջինն էլ քաղաքապետ կընտրի:

–Մենք հակված ենք համագործակցության,-ասել է Ն. Զոհրաբյանը:

Նա անընդունելի է համարել ՀՀԿ մամուլի խոսնակի այն հայտարարությունը, թե իրենք քաղաքը չեն պատրաստվում հանձնել։

–«Մենք Երևանը չենք հանձնելու» ձևակերպումն ինձ հիշեցնում է «Ստալինգրադը չենք հանձնելու» կամ «Հետևում Կուրսկն է» արտահայտությունները: Խորհուրդ կտամ ձեռնպահ մնալ նման հայտարարություններից: Երևանցին ի՛նքն է որոշելու, թե ո՞ր քաղաքական ուժին է տալու իր քվեն, ո՞ր քաղաքական ուժն է ձևավորելու ավագանի, որն էլ կընտրի Երևանի քաղաքապետ: Որևէ մեկը Երևանն իր գրպանը չի դրել, որ հետո ասի՝ հանձնելու է կամ չի հանձնելու,-ընդգծել է Ն. Զոհրաբյանը:

Նա ամբարտավան և ՀՀ քաղաքացու նկատմամբ վիրավորանք է համարում որևէ քաղաքական ուժի այն հայտարարությունը, թե՝ առաջին տեղը մենք ենք որոշելու, երկրորդ տեղից այն կողմ որոշումը թողնում ենք Երևանի ընտրողին:

–Երևանի ընտրողն այս ամբարտավան վարքագծի պատասխանն անպայման կտա,-նշել է ԲՀԿ–ական պատգամավորը:

Նաիրա Զոհրաբյանը նաև ավելացրել է, որ ԲՀԿ–ն պատրաստ է կարճ ժամանակում նախաձեռնել «Ընտրական օրենսգրքի» բարեփոխումների լայն փաթեթի մշակումը՝ հիմքում ունենալով 100–տոկոսանոց համամասնական ընտրակարգին անցումը:

Ինչ վերաբերում է ՀՀ նախագահի հայտնի հարցազրույցին, Ն. Զոհրաբյանը նշել է, որ եթե այնտեղ իրապես ուղերձ կար, որ այս կառավարությունը փայլուն է աշխատել, և այս վարչապետը պետք է շարունակի պաշտոնավարել, ապա սա հերթական աղետն է լինելու Հայաստանի համար.

–Այս կառավարությունը՝ այս վարչապետով, երկիրը տանում է փակուղի։ Հորդորում եմ թվերից ձերբազատվել ու խոսել փաստերով: 7 տոկոսը պետք է արտացոլվի աղքատության կրճատմամբ, որն օրեցօր աճում է: Այստեղ խայտառակ կոնֆլիկտ կա՝ հայտարարված փուչիկ թվերի և իրականության միջև,–ընդգծել է նա՝ ավելացնելով, որ կառավարությունը ղեկավարում է մի անձ, ով իր տնտեսական հեռանկարների և հայկական աշխարհի մասին պատկերացումներում իլյուզյոն մոտեցումներ ունի և որևէ գործնական, դրական բան առ այս պահը չի արել:

7or.am