Այսօր մեկնարկած 5–րդ գումարման ԱԺ քառօրյա նիստի ժամանակ «Ժառանգություն» խմբակցության անդամ Զարուհի Փոստանջյանը օրակարգի հաստատման վարման կարգի անվան տակ ձայնի իրավունքն խնդրելով՝ սկսել է բոլորովին այլ բովանդակությամբ նամակ կարդալ։ ԱԺ փոխնախագահ Էդուարդ Շարմազանովն ընդգծել է, որ Փոստանջյանի խոսքը վարման կարգի հետ կապ չունի և հնարահանգել է անջատել նրա բարձրախոսը:

Նույն բանը Զարուհի Փոստանջյանն արել է նաև ԱԺ նախագահ Հովիկ Աբրահամյանի կողմից օրակագը ներկայացնելու ժամանակ: Այս անգամ ևս նրա բարձրախոսն անջատել են։

Փոստանջյանի այս պահվածքը վրդովեցրել է ՀՀԿ–ական պատգամավոր Մանվել Բադեյանին, ով ԱԺ նախագահից խնդրել է Զարուհի Փոստանջյանին դուրս հանել դահլիճից.

–Նա խանգարում է մեր աշխատանքը: Հակառակ դեպքում ե՛ս կհեռանամ դահլիճից,–հայտարարել է Բադեյանը։

Հովիկ Աբրհամյանը, սակայն, չի անսացել ՀՀԿ–ական պատգամավորի այս խնդրանքին:

Ի դեպ, մինչ այս միջադեպը Հ. Աբրահամյանը հայտարարել է, որ դեմ չէ հետընտրական զարգացումների վերաբերյալ արտահերթ նիստ հրավիրելուն ու բոլոր խմբակցություններին հորդորել է հավաքվել ու ևս մեկ անգամ քննարկում անցկացնել այդ կապակցությամբ։

Ավելի ուշ Զարուհի Փոստանջյանը լրատվամիջոցներին է տարածել Սերժ Սարգսյանի «դիմումը» Րաֆֆի Հովհաննիսյանին, որը նա փորձում էր կարդալ խորհրդարանում։ Դրանում իբր Սերժ Սարգսյանը խոստովանել է, թե հասկացել է՝ պարտվել է ընտրություններում և բարոյականությունն ու քաղաքականությունն իրար նկատմամբ դրել է հակադրության մեջ: 

«Ամեն օր հետևում եմ Ազատության հրապարակին, տեսնում եմ՝ ինչպես ես կրում անարդարությունը: Տեսնում և զգում եմ, որ դու երջանիկ ես, քեզ սիրում են, և դու էլ ես սիրում: Տեսնում եմ` ինչպես բարոյականությունը հաղթեց հաշվարկված քաղաքականությանը: Տեսնում եմ` ինչպես լինելով մենակ՝ ապացուցեցիր, որ միասնական ես և հավաքական:

Սիրելի՛ Րաֆֆի, ընդունում եմ քո հաղթանակը, մեր հավաքական և միասնական հաղթանակը: Ընդունում եմ Ազատության հրապարակի ոգին և օրակարգը:

Անկեղծ և անկաշկանդ հայտնում եմ՝ ես այլևս չեմ ցանկանում լինել «փոքր մարդ», արգելափակված մութ զննդանում, ես չեմ ցանկանում խուսափել պատասխանատվությունից: Ապրիլի 9-ին Ազատության և Հանրապետության հրապարակներում պատրաստ եմ մասնակցել Նոր Հայաստանի Հանրապետության 4-րդ նախագահ Րաֆֆի Հովհաննիսյանի երդումնակալության արարողությանը: Որից հետո նրանից հայցում եմ` ներում շնորհել ինձ և բոլորիս»,–իբրև թե ասված է Սերժ Սարգսյանի «դիմում»–ում: 

7or.am