Մարտի 18-ին ժամը 11:30-ին ՀՀ Վերաքննիչ քրեական դատարանում կհրապարակվի Մարիամ Գևորգյանի գործով դատավճիռը, այդ մասին Դատարանը հայտնեց մարտի 15-ին`  հերթական դատական նիստի ժամանակ: Դատավճիռը հրապարակվելու է դռնբաց, ուստի ցանկացողները կարող են մասնակցել:

Դատավճռի հրապարակմանը մասնակցելու է նաև «Ընդդեմ Կանանց Նկատմամբ Բռնության» կոալիցիան: Ակնկալում ենք նաև լրատվամիջոցների ներկայացուցիչների և գործով հետաքրքրված քաղաքացիների ներկայությունն ու ակտիվ մասնակցությունը:

Հիշեցնենք, որ Մարիամի սկեսուրը Հայկանուշ Միքայելյանը իր որդու` Դավիթ Զիրոյանի հետ միասին խոշտանգումների է ենթարկել Մարիամ Գևորգյանին: Մ.Գևորգյանը Զիրոյանի հետ ամուսնացել է 2009 թվականի նոյեմբերին, նույն տարվա դեկտեմբերին մեկնել է Սանկտ Պետերբուրգ, որտեղ աղջկան 10 ամսվա ընթացքում պարբերաբար ծեծի և խոշտանգումների են ենթարկել: Երևան վերադառնալուց հետո Գևորգյանը դիմել է ոստիկանություն, ամուսնուն մեղադրանք է առաջադրվել «Դիտավորությամբ ուրիշի առողջությանը միջին ծանրության վնաս պատճառելու» և «Ծեծ» հոդվածներով, որի համաձայն նրան կարող էին դատապարտել մինչև 3 տարվա ազատազրկման: Քննիչի որոշմամբ` Զիրոյանն ազատ է արձակվել` Հայաստանի Հանրապետության 20-ամյակի կապակցությամբ, ՀՀ նախագահի կողմից հայտարարված համաներմամբ:  Հայկանուշ Միքայելյանի դեմ առաջադրված է մեղադրանք ՀՀ քրեական օրենսգրքի 113 (միջին ծանրության վնասվածնքեր հասցնել) և 119 (խոշտանգում) հոդվածներով: Հայկանուշ Միքայելյանը մեղավոր ճանաչվեց առաջադրված մեղադրանքներում` դատապարտվելով 4 տարի ժամկետով ազատազրկման: Դատարանը միաժամանակ որոշեց կիրառել համաներում և նշանակված պատժի չափը 1/3 –ով կրճատել, իսկ այնուհետև հանեց ամբաստանյալի կալանքի տակ գտնվելու ժամանակահատվածը:  Տուժող Մարիամ Գևորգյանի կողմից ներկայացված քաղաքացիական հայցն ամբողջությամբ դատարանը թողեց առանց քննության և չբավարարեց: