«Զվարթնոց վերածննդի» հիմնադրամը «Նարեկացի» արվեստի միությունում  հանրությանը ներկայացրեց  իր  գործունեությունը` հիմնադրամի մինչ օրս  իրականացրած և առաջիկա ծրագրերը։

«Զվարթնոց վերածննդի» հիմնադրամը  ստեղծվել է 2011թ., նրա հիմնական առաքելությունն է   հոգևոր-մշակութային արժեքների պահպանումն ու վերածնունդը  Հայաստանում և սփյուռքում: Հիմնադրամն մինչ օրս իրականացրել է մի շարք ուշագրավ  մշակութային  նախագծեր,  ծրագրեր:

 Մեծ ուշադրություն է դարձնում հատկապես  «խոնարհված» պատմամշակութային հուշարձաններին և եկեղեցիներին: Նկարահանել է «Խոյակ» ֆիլմը, որտեղ պատմվում է Արագածոտնի մարզի Աղցք գյուղի Արշակունյաց դամբարանի /5-րդ դար/, Բյուրականի սբ. Հովհաննես /10-րդ դար/ և Արտավազիկ /7-րդ դար/ եկեղեցիների մասին:

Հիմնադրամը Հայ Առաքելական Եկեղեցու օրհնությամբ   իրականացնում է   հայ  դասական, հոգևոր և ժողովրդական երգի քարոզմանն  ու պահպանմանն ուղղված ծրագրեր. դրանցից է` «Զվարթնոց» հայ երգի մրցույթ- փառատոնի  անցկացումը Հայաստանում և Սփյուռքում: 2012թվ.-ին մրցույթ- փառատոնի  լսումները  մեկնարկել են    Մոսկվա  և Սանկտ-Պետեբուրգ քաղաքներում և շարունակվել   ՀՀ մարզերում և Լեռնային Ղարաբաղում: Մրցույթին  ՀՀ–ից հայտագրվել ու մասնակցել են  15-30 տարեկան շուրջ 3000 երիտասարդ։ Ժյուրիի կազմում  Երևանի Կոմիտասի անվան կոնսերվատորիայի վոկալ բաժնի պրոֆեսորներ են:            

–Եթե մենք ունենք Կոմիտաս, մենք իրավունք չունենք թրքա- արաբական կլկլոցներով երգեր երգել, –ասում է «Զվարթնոց վերածնունդ» հիմնադրամի հիմնադիր Սուսաննա Բաղդասարյանը:

Հիմնադրամը   գործում է Բաղդասարյան ամուսինների անձնական ֆինանսներով և այսօր իր առաքելությունը շարունակելու համար  ֆինանսական աջակցության կարիք ունի:

Հիմնադրամն իր առաքելությունն իրականացնելու համար ստեղծել է  ճանաչողական հուշանվեր`   նկարազարդ քարտեզ- ուղեցույց , որտեղ նշված են Երևանի կենտրոնում գտնվող պատմամշակութային արժեք ունեցող հուշարձանների, շենքերի, այգիների լուսանկարները, որոնց   համապատասխան դասավորության դեպքում ստացվում է Երևանի կենտրոնի քարտեզը: Հիմնադրամը նախատեսում է քարտեզ- ուղեցույցի վաճառքից ստացված գումարը ծառայեցնել իր հիմնական առաքելությանը:

                                                                                                                                                                                        «Նարեկացի» արվեստի միություն