«Սյունիքի մարզի Սևաքար գյուղի եկեղեցին նորոգելու համար ֆինանսական միջոցներ են պետք, եւ ես դիմել եմ հանրապետությունում ու երկրի սահմաններից դուրս ապրող  սեւաքարցիներին` փորձելով համախմբել նրանց եւ մեր միջոցներով նորոգել սրբատեղին:  Ոչ մի պատկան կառույցի  չեմ դիմել», -«7օր»-ի թղթակցի հետ հեռախոսազրույցում ասել է  Սեւաքարի գյուղապետ   Արտաշես Հակոբյանը: Նա հերքել է մամուլում հրապարակված տեղեկատվությունը,  թե դիմել է «Պատմամշակութային արգելոց-թանգարանների եւ պատմական միջավայրի պահպանության ծառայություն» ՊՈԱԿ-ի մարզային ծառայության պետին եւ Սյունյաց թեմին, եւ իրեն ասել են՝ գյուղում փողատեր մարդ  ճարի, թող նորոգի:

Գյուղապետի  խոսքով՝  մարզային ծառայության պետն առաջարկել է հանդիպել «Երկիր եւ մշակույթ»  ֆրանսիական կազմակերպության ներկայացուցիչների հետ` ներկայացնել եկեղեցու վիճակն ու խնդրել նրանց նորոգել նաեւ Սեւաքարի եկեղեցին:

Նշենք, որ «Երկիր եւ մշակույթը» արդեն  տեւական ժամանակ է՝ Հայաստանում իրականացնում է եկեղեցիների վերականգնում ու նորոգում:

Մեզ հետ հեռախոսազրույցում «Պատմամշակութային արգելոց-թանգարանների եւ պատմական միջավայրի պահպանության ծառայություն» ՊՄՊ մարզային ծառայության պետ Աստղիկ Հակոբյանը տեղեկացրեց, որ  անցյալ տարի ինքը  «Երկիր եւ մշակույթ» կազմակերպությանը գրավոր առաջարկել է նորոգել առավել վտանգված երկու ` Շիկահողի եւ Սեւաքարի եկեղեցիները: Կազմակերպությունը նախապատվությունը տվել է Շիկահողի եկեղեցու նորոգմանը: