«Հաշվի առնելով այն հանգամանքը, որ այս տարի նշվում է Արցախի (Լեռնային Ղարաբաղի) ժողովրդի կողմից իր ինքնորոշման իրավունքի իրականացման 25-ամյակը եւ այն, որ Լիտվան մշտապես աջակցել է այդ ձգտմանը եւ քաջալերել, որպեսզի հիմնախնդիրը խաղաղ լուծում ստանա,

Համարելով, որ Լիտվայի եւ Արցախի ժողովուրդներն անկախության համար իրենց պայքարում ղեկավարվել են միջազգային իրավունքի լայնորեն ընդունված չափանիշներով, ժողովրդավարական արժեքներով եւ ընդհանուր գաղափարներով՝ հանձնառություն, որին նրանք ցայսօր հավատարիմ են,

Կիսելով ընդհանուր Եվրոպայի տարածքի տեսլականը, որտեղ յուրաքանչյուր բնակիչ ապահովված է մարդու հիմնական իրավունքներից եւ հիմնարար ազատություններից ազատորեն օգտվելու իրավունքով,

Հաշվի առնելով այն, որ միջազգային պրակտիկայում ինքնորոշման իրավունքը ժողովուրդների անվտանգության եւ ժողովրդավարական զարգացման միակ հնարավոր երաշխիքն է,

Նշելով բոլոր մակարդակներում օրինական ընտրությունների միջոցով ազատ ու ժողովրդավարական հասարակություն կառուցելու եւ պատասխանատու ու գործուն կառավարություն ձեւավորելու գործում Արցախի նշանակալից ջանքերը,

Համարելով, որ կարեւոր է առկա հիմնախնդիրները լուծելու եւ տարածաշրջանում երկարատեւ խաղաղություն ու կայունություն հաստատելու գործում Արցախի ներգրավվածությունը միջազգային հանրության շրջանում,

Մենք՝ Լիտվայի Հանրապետության Սեյմասի մի խումբ պատգամավորներս, հայտարարում ենք Լիտվայի Հանրապետության Սեյմասում Արցախի Հանրապետության (Լեռնային Ղարաբաղի Հանրապետության) հետ բարեկամության խումբ ստեղծելու մասին»: