Այսօրվա ասուլիսին, անդրդառնալով հետընտրական գործընթացներին, «Ազգային համաձայնություն» կուսակցության նախագահ, ՀՀ նախագահի նախկին թեկնածու Արամ Հարությունյանը հայտնել է, թե ընտրությունները վերահաստատեցին, որ իշխանությունները ժողովրդի կողմից բավարար աջակցություն չունեն։

Ինչ վերաբերում է Րաֆֆի Հովհաննիսյանի գործողություններին, բանախոսն ասել է. «Րաֆֆի Հովհաննիսյանն իր ձայների ձեռքը կրակն է ընկել։ Ես հարցազրույցով եմ ասել, որ Րաֆֆի´ Հովհաննիսյան,  կամ տեր ես Սերժ Սարգսյանի դեմ քվեարկած ձայներիդ, կամ, կներես, Սերժ Սարգսյանն է քո տերը»:

Արամ Հարությունյանն ընդգծել է, որ այսօր պետք է խնդիրը հստակ ձևակերպել. «Եթե պիտի Րաֆֆի Հովհաննիսյանը դառնա նախագահի ընդդիմությունը, այլ ոչ թե նախագահին ընդդիմություն, ապա դա շատ վատ բան է, և ժողովուրդը չի ների նրան»։

Ըստ բանախոսի՝ Րաֆֆի Հովհաննիսյանի և իշխանությունների համագործակցության սցենար եղել է, սակայն  թե ինչ զարգացումներ կլինեն այսուհետ, դժվարանում է կանխատեսել: «Այս պահին ամեն ինչ անկանխատեսելի է, քանի որ գործ ունենք Րաֆֆի Հովհաննիսյանի հետ և չենք կարող ասել, թե որ պահին նա ինչ որոշում կկայացնի։ Քաղաքական դաշտում Րաֆֆին նախ և առաջ ինքն իր համար է անկանխատեսելի»,–ասել է ԱՀԿ նախագահը։

7or.am