ՀՀ նախագահի թեկնածու, «Ազատություն» կուսակցության ղեկավար Հրանտ Բագրատյանը լրագրողների հետ հանդիպման ժամանակ հայտարարել է, որ երբ Պարույր Հայրիկյանն ու Րաֆֆի Հովհաննիսյանը հայտարարեն, որ իրենք ընդդիմություն են՝ ընտրություններից հետո պաշտոն չեն ստանալու և Սերժ Սարգսյանի ընտրվելու դեպքում նրան չեն շնորհավորելու, այդ ժամանակ նոր ինքը կմիանա միասնական թեկնածուի գաղափարին։

–Ես ընդդիմություն եմ, իսկ իրենք՝ ոչ,-հայտարարել է Բագրատյանը,–մեր հանդիպումների ժամանակ քննարկել ենք միասնական թեկնածուի հարցը, բայց պայմանավորվել էինք չբարձրաձայնել այդ մասին: Պայմանավորվածությունը խախտվեց: Հայրիկյանը ցանկացավ ավելի լավը երևալ: Ես Պարույրին շատ հստակ պատասխանել եմ՝ եթե դու ազնիվ ես, հանի՛ր թեկնածությունդ, և սա կլիներ տղամարդու արարք: Ինքդ հանիր և օրինակ ցույց տուր մյուսներին։

Բագրատյանը նաև վստահ չէ, որ Հայրիկյանը չի համագործակցում իշխանությունների հետ: Երբեք չի լսել նաև, որ Հայրիկյանն իշխանությանը քննադատի: 

–Մի կողմ թողնենք, որ նրա հայտարարությունները մի քանի անգամ փոխվել են: Բայց ես բացարձակապես տրամաբանություն և կապ չեմ տեսնում նրա ՍԴ դիմելու և միասնական թեկնածու ունենալու հարցի միջև: Չի կարելի խնդիրը կապել միասնական թեկնածուի հետ: Դա պահանջ է ուղղված իշխանությունից՝ գնա, ստիպի՛ր, որ դառնանք միասնական թեկնածու, որ վերջում էլ քեզ շնորհավորենք: Սա միասնական թեկնածուի թեզի տակ եղած ընդդիմադիր դաշտը զրոյացնելու փորձ է, այստեղ տեսնում եմ նաև իշխանության խաղը:

Էրեբունի վարչական շրջանում ընտրողների հետ հանդիպման ժամանակ էլ Բագրատյանը հայտարարել էր, որ իրենք հսկայական գումարեր են վատնել քարոզարշավի վրա և միասնական թեկնածուն պետք է փոխհատուցի այդ ծախսերը:

7or.am