ՀՀ ՊՆ մամուլի խոսնակ Արծրուն Հովհաննիսյանը ֆեյսբուքյան իր էջում գրել է.

«Հարգելի բարեկամներ, ես մի քանի անգամ խնդրել եմ ՁԵԶ խոսքում չօգտագործել «ազերի» բառը, խնդրանքս կրկնում եմ, և այդ ցուցակը մի փոքր մեծացնում.
Ազերի, ղարաբաղա-ադրբեջանական հակամարտություն կամ շփման գիծ, արցախցիներ, Հայաստան և Արցախ, Մեծ եղեռն: 
Երևի այս ցանկը կարելի էր ավելի մեծացնել, ուղղակի, հիմա չեմ հիշում: Ընկերներիս խնդրում եմ նաև տարածել սա. որքան լայն արձագանք գտնի այն հայ հասարակության շրջանում, այնքան արագ վերջ կտանք թուրքական ևս մեկ քարոզչական զենքի: Սա զենք է, որի դեմ պայքարի անհրաժեշտության ընկալումը դեռ համազգային չէ, ցավոք»:

Ուշագրավն այն է, որ ընդամենը մեկ օր առաջ ՀՀ նախագահ և նախագահի թեկնածու Սերժ Սարգսյանը Մալաթիա-Սեբաստիա վարչական շրջանի ընտրողների հետ հանդիպման ժամանակ օգտագործել է «եղեռն» բառը՝ հայտարարելով, որ մենք ինքներս 40-50 տարի ցեղասպանություն բառի փոխարեն եղեռն ենք օգտագործել և այդտեղ որևէ խնդիր չկա։.

–Մեզ համար այդ 2 բառերը նույնն են: Միգուցե մեր ոչ ճիշտ շեշտադրումների պատճառով ԱՄՆ նախագահն արտասանեց եղեռն բառը, բայց ոչ թե իր գրասենյակում, այլ երկրրի խորհրդարանում: Այնպես որ, եթե նա ասեր ցեղասպանություն, էլի դժգոհելու էինք, թե ինչո՞ւ երկու անգամ չասեց,– նշել է Սարգսյանը:

Մեր այս հիշեցմանն ի պատասխան՝ Արծրուն Հովհաննիսյանը նկատել է.

«Իմ ասած Մեծ Եղեռնի չգործածման հորդորը վերաբերվում է նրան, որ ընդհանուր երկարամյա կոտորածների գործընթացին, որ ասում ենք եղեռն կամ ցեղասպանություն չանվանենք միայն այդ գործընթացի վճռական, ամենաինտենսիվ և ամենածավալուն փուլին՝ 1914թ. հոկտեմբեր-1916թ. ամառ, տրվող անվանումով: Այսինքն Եղեռնը դա անհիշելի ժամանակներից մինչև 1920 ականները եղածն է, իսկ Մեծ Եղեռնը արդեն նշեցի 1914 հոկտեմբեր-1916 ամառ: Կարծում եմ այս ամենով ակնհայտ է իմ ասածի և ՀՀ նախագահի ասածի տարբերոությունները, դրանք անգամ նույն բանը կարելի է համարել, և ոչ մի դեպքում հակադրել: Ավելին ես էլ եմ համաձայն նախագահի հետ քանզի եղեռնը դա հայկական բառ է ինչպես հոլոքոստը, իսկ ցեղասպանությունը զուտ իրավաբանական բոնորոշում: Եղեռնը դա մերն է հայկականը...»։

7or.am