Հայաստանի Հանրապետությունում պետական և քաղաքական համակարգերի կայացման գործընթացները բավարար տեմպերով  չեն զարգանում:

Անհրաժեշտ է տարվող աշխատանքները կազմակերպել այնպես, որ ժողովրդի համար արդյունքները լինեն գոհացուցիչ:

Բայց  քանի դեռ դա այդպես չէ` ժողովրդի հիասթափությունը շարունակելու է մեծանալ սեփական երկրի հանդեպ և արտագաղթի տեմպերը ավելանալու են, իսկ բնակչության սոցիալ-տնտեսական կարգավիճակը անկում է ապրելու:

Առավել վտանգավոր է, երբ ռազմավարական նշանակություն ունեցող սահմանային գյուղերում արտագաղթը դառնում է համատարած, մինչդեռ թշնամու անմիջական հարևանությամբ բնակվող մեր հայրենակիցը պիտի զգա ոչ միայն հայկական հզոր բանակի առկայությունը, այլ նաև պետության կողմից իր հանդեպ ցուցաբերվող սոցիալական ուշադրությունը:
Ժողովրդի համատարած ծանր կարգավիճակը պայմանավորված է հիմնականում աշխատատեղերի բացակայությամբ:

Գործազրկությունը հնարավոր կլինի կրճատել, եթե ստեղծվի զբաղվածության պետական ծրագիր և դրա կենսագործման, ինքնազբաղվածության մեխանիզմների կատարելագործման, աշխատանքի ազատ ընտրության հնարավորությունների ընդլայնման, մարդկանց մասնագիտական կարողությունների մեծացման և աշխատատեղերի ստեղծման ոլորտում առկա այլ խնդիրների լուծման համապատասխան պայմաններ:

Դեմոկրատական արժեքները որդեգրելով որպես մեր երկրի զարգացման ու առաջընթացի միակ տարբերակ` պիտի գիտակցենք, որ գտնվելով զինադադարի մեջ անհրաժեշտ է, որ հզոր բանակ ունենալով հանդերձ, կառուցենք մրցունակ ժողովրդավարություն, որին հնարավոր է հասնել, երբ օրենքի գերակայությունը վեր դասվի անձնական շահերից և պետական պաշտոնյան չկարողանա կամայական որոշումներ կայացնել ու չպատժվել դրանց համար:

Այս ամենն անդրադառնում է Հայաստանի Հանրապետության միջազգային հեղինակության վրա` սասանում պետության վարկանիշը, իսկ մեր երկրի միջազային հեղինակությունը չափազանց թանկ է, որպեսզի այն շարունակական ենթարկենք փորձությունների:

Միջազգային բարձր ամբիոնները պիտի հարթակ ծառայեն առկա խնդիրների բարձրացման և լուծման համար:

Այն օրը, երբ անհատի շահը կվերափոխվի ընդհանուր շահի` այդ ժամ միայն կկերտենք մեծ հաղթանակներ:

Իսկ մինչ այդ, մեկը մյուսին վարկաբեկելով ու փնովելով, հնարավոր չէ անել ավելին, և երկրի ներքաղաքական իրավիճակը և ժողովրդի կենսամակարդակն ու բարոյահոգեբանական ծանր կարգավիճակի բարձրացմանն ուղված բոլոր քայլերը դատապարտված են ձախողման:

Անհրաժեշտ է մարդու համար ստեղծել համապատասխան պայմաններ` արժանապատիվ աշխատանք ունենալու իր և իր ընտանիքի հոգսերը լիարժեք հոգալու և բարեկեցիկ կյանքով ապրելու համար:

ԱԺ ԲՀԿ պատգամավոր Վահե Էնֆիաջյան