ՀՀ նախագահի թեկնածու Արման Մելիքյանն այսօր հրավիրված ասուլիսում ընդգծել է, որ իր նկատմամբ սև PR-ն արդեն սկսվել է։

–Անտեսելու փուլից դուրս ենք եկել, հասել ենք մրոտվելու փուլին։ Այս փուլն էլ կհասցնի ճշմարտության բացահայտման փուլին,–ասել է Ա. Մելիքյանը։

Նա իշխանություններին երկխոսության և համագործակցության առաջարկ է արել ընտրությունների իրավաչափությունն ապահովելու հարցում.

–Ընտրությունների հիմնականում կեղծարարը իշխանությունն է: Թաղապետները շենքերի լիազորներին հավաքում են և նրանց միջոցով ճնշում բնակիչներին: Այդպիսի մարդիկ մտել են նույնիսկ Աջափնյակում բնակող մորս տուն, նույնիսկ մեր շտաբի անդամի տուն են մտել և կաշառք առաջարկել: Ոչ մի քաղաքացի ապահովագրված չէ այդ տխմար ճնշումներից: Մենք ամեն դեպքում համարում ենք, որ իշխանությունների հետ երկխոսությունը սկսվել է:

Մելիքյանի համար նաև տարօրինակ է, որ մահափորձի ենթարկված Պարույր Հայրիկյանը չի դիմում ՍԴ՝ ընտրությունները հետաձգելու դիմումով.

–Նա լուրջ վնասվածք է ստացել, և բնական կլինի, եթե այդ երկշաբաթյա ժամանակն օգտագործի: Եթե այդ բանը չի արվում, ուրեմն ճնշումներ են եղել իշխանության շահերը պաշտպանող ինքնակոչների կողմից:

7or.am