ՀՀ Ոստիկանության հասարակայնության հետ կապերի վարչության պետ Աշոտ Ահարոնյանը Ֆեյսբուքի իր էջում գրել է.

«Այս գիշեր արտակարգ դեպք պատահեց: Կատարվածն իրոք աննախադեպ էր և իրավիճակը՝ արտակարգ, ոչ միայն հասարակության, պատկան մարմինների, այլև լրագրողների համար: Եվ գոհունակությամբ կարող ենք փաստել, որ մեր լրագրողական ընկերակցությունը պրոֆեսիոնալ ու արժանապատիվ պահվածք դրսևորեց այդպիսի իրավիճակում:

Ցանկանում եմ շնորհակալություն հայտնել բոլոր գործընկերներիս՝ իսկապես պրոֆեսիոնալ աշխատանքի համար, այն մասնագիտական համագործակցության և համերաշխության համար, որ դրսևորեցին այս դրամատիկ գիշերվա ու հետագա ընթացքում: Ի վերջո, բոլորիս նպատակը համատեղ ուժերով նման իրավիճակների բացառումն է, իսկ լինելու դեպքում՝ հասարակությանը օպերատիվ, ստույգ և, ամենակարևորը, անկողմնակալ տեղեկատվության տրամադրումը:

Աստված տա այսուհետ նման ինֆորմացիա տարածելու անհրաժեշտությունը չունենանք, սակայն պահպանենք առկա և այս գիշերվա ընթացքում ապացուցված մարդկային, քաղաքացիական ու մասնագիտական եղբայրությունը:

Իհարկե, վրիպումներ էլ եղան, ինչը բնական է նման լարված իրավիճակներում: Բայց համոզված եմ միտումնավոր չէին եւ առաջիկայում նման վրիպումները աստիճանաբար նվազելու ու վերանալու են` դարձյալ միասնության շնորհիվ»: