«Կենտրոնական ընտրական հանձնաժողովը խստորեն դատապարտում է ՀՀ նախագահի թեկնածու ԱԻՄ նախագահ Պարույր Հայրիկյանի դեմ նախօրեին տեղի ունեցած զինված հարձակումը և հուսով է, որ այն կբացահայտվի»,- ԿԸՀ այսօրվա նիստում հայտարարեց Տիգրան Մուկուչյանը։ Նա միաժամանակ տեղեկացրեց, որ ԿԸՀ անդամներն այսօր պատրաստվում են անձամբ այցելել Պարույր Հայրիկյանին:

ԿԸՀ նախագահը նաև որոշ պարզաբանումներ ներկայացրեց, կապված ՀՀ Սահմանադրության 52-րդ հոդվածով և ընտրական օրենսգրքի 98-րդ հոդվածով սահմանված, թեկնածուի համար անհաղթահարելի խոչընդոտներ առաջանալու դեպքում, քվեարկությունը երկշաբաթյա ժամկետով հետաձգելու մասին: Ըստ Տ. Մուկուչյանի, որպես անհաղթահարելի խոչընդոտ կարող է ճանաչել միայն Սահմանադրական դատարանը՝ Սահմանադրության 100-րդ և 101-րդ հոդվածների համաձայն և բացառապես տվյալ թեկնածուի դիմումի հիման վրա: Ընդ որում ՝ դիմումը քննարկելու համար սահմանված է հստակ, կարճ՝ 4-օրյա ժամկետ: Հաշվի առնելով այդ հանգամանքը ԿԸՀ-ն, ինչպես նշեց Տ. Մուկուչյանը, ընտրական գործընթացի հետ կապված գործառույթները պետք է իրականացնի ժամանակացույցով սահմանված ժամկետներում: