Վերջերս Ախալքալաքում շրջանառվող տեղեկությունների համաձայն, երկրի ազգային անվտանգության նախարարության աշխատակիցները խստիվ արգելել են Վրաստանի հայ ուսուցիչներին մասնակցել Հայաստանում անցկացվելիք վերապատրաստման աշխատանքներին:

Ինչպես տեղեկացանք Հայց. եկեղեցու Ջավախքի առաջնորդական ընդհանուր փոխանորդությունից, նման ծրագիր, իրոք, եղել է ՀՀ ԿԳ նախարարության հետ համատեղ, որի շրջանակներում վրաստանաբնակ մոտ 150 հայ ուսուցիչներ պետք է վերապատ­րաստական դասընթացների մասնակցեին Հայաստանում' հայ եկեղեցու պատմություն առարկայի շուրջ: Այդ ծրագիրը պետք է տևեր մեկ ամիս և անցկացվեր երկու փուլով. այս տարի պետք է մասնակցեին ուսուցիչների մի մասը, իսկ հաջորդ տարի' մյուս: Սակայն, ինչպես պարզվեց, նախաձեռնության իրագործման հետ կապված լուրջ խնդիրներ են առաջացել' այնքան լուրջ, որ այն գրավել է Վրաստանի Ազգային Անվտանգության նախարարության ուշադրությունը:

Հավաստի տեղեկատվության աղբյուրների տրամադրած ինֆորմացիայի համաձայն, երկրի Ազգային Անվտանգության նախարարության աշխատակիցներն իրենց մոտ հրավիրելով հայկական դպրոցների ուսուցիչներին, խստիվ զգուշացրել և պահանջել են, որ նրանք հրաժարվեն Հայաստանում վերապատրաստական դասընթացների մասնակցության մտադրությունից: Նույն տեղեկատվության աղբյուրների հաղորդմամբ, մանկավարժներին զգուշացվել է, որ եթե նրանք մեկնեն, ապա հետագայում խնդիրներ կունենան, քանի որ «նրանց Հայաստան տանելն իրականում այլ նպատակ է հետապնդում»: Այս խոսքերից ուսուցիչներն այնքան են վախեցել, որ անգամ խուսափում են եկեղեցի այցելել:

Այս դեպքի առնչությամբ, տեղաբնակների կարծիքը գրեթե նույնն է. եթե տարիներ առաջ Ազգային Անվտանգության նախարարությունը գործում էր որոշակիորեն զուսպ, ապա այժմ սկսել է բացահայտորեն միջամտել նույնիսկ կրթական բնույթ ունեցող նախագծերի իրականացմանը: Այս ծառայության նման կոպիտ պահվածքն ու անհարկի միջամտությունը մեկ անգամ ևս վկայում է, որ նման քայլերով պարզապես ուզում է մեծ արջի ծառայություն մատուցել երկրի իշխանություններին:

Ըստ որոշ տեսակետների, նման միջամտություններն իրականում նպատակ ունեն ճնշել և ոտնահարել հայ եկեղեցու իրավունքները' փոխարենը ուժ եվ իշխանություն տալով վրաց եկեղեցուն: Շատերն էլ գտնում են, որ բոլորովին չեն զարմանա, եթե մի օր էլ հայ եկեղեցու հեգեվորականներին կանչեն Ազգային Անվտանգության կառույց և պահանջներ թելադրեն...

Հավելենք, որ այժմ դեպքի առնչությամբ դիմվել է Վրաստանի ԿԳ նախարարություն, և մոտ օրերս ակնկալվում է նախարարի դրական պատասխանը:

Ա-ԻՆՖՈ