ՀՀ Տնտեսական մրցակցության պաշտպանության 
պետական հանձնաժողովի նախագահ 
Արտակ Շաբոյանին

Բաց Նամակ

«Հարգելի պարոն Շաբոյան
Հաշվի առնելով այն հանգամանքը, որ Հայաստանի Հանրապետության Տնտեսական Մրցակցության Պաշտանության Պետական Հանձնաժողովը կոչված է պաշտպանելու ՀՀ-ում տարբեր ոլորտներում առկա մրցակցությունը, հետազոտել տարբեր ապրանքների գնաճի պատճառներն ու մեխանիզմերը, ցանկանում ենք դիմել Ձեզ հետևյալ խնդիրը ուսումնասիրելու և պարզաբանելու խնդրանքով:
Հայտնի է, որ ՀՀ-ում հունվարի 1-ից 4-ը հաց չի եղել, մասնավորապես, չեն աշխատել Հայաստանում գործող հացի արտադրամասերը: Սա Հայաստանի Հանրապետության որոշ մարզերում բերել է հացի գնի կտրուկ թանկացման որոշ վաճառակետերում: Այլ կերպ ասած, այն վաճառակետերում, որտեղ հնարավոր է եղել գտնել հաց, այն արժեցել է որոշ դեպքերում մի քանի անգամ ավելի թանկ, քան մինչ Ամանորյա տոները: Մասնավորապես, մենք ունենք տվյալներ, որ Գյումրիում Ամանորյա տոներին հացը, որը մինչ Ամանոր արժեցել է 80 դրամ, հնարավոր է եղել գնել 3 անգամ ավելի թանկ գնով` 250 դրամով, , այսինքն, օգտվելով նրանից, որ Գյումրիում հնարավոր չէ այլ վաճառակետերում հաց գտնել, այն վաճառակետերը, որոնք ունեցել են հաց, չարաշահելով այդ հանգամանքը, հացը վաճառել են 3 անգամ ավելի թանկ գնով:
Հայտնի է նաև դեպքեր մայրաքաղաք Երևանում, երբ վաճառակետերում հայտնված հացը անմիջապես սպառվել է: Դրանք արագորեն գնել են վերավաճառողները` հետագայում շատ ավելի թանկ գնով վաճառելու համար: Կրկին անգամ նշում ենք, որ հացի գնի նման բարձրացման ուղղակի պատճառն է եղել այն, որ ՀՀ-ում հունվարի 1-ից 4-ը չեն գործել հացի արտադրամասերը: 
Մենք, ՀՀ մի շարք քաղաքացիներ, լինելով խնդրով մտահոգ, խնդրում ենք անդրադառնալ այս խնդրին և ուսումնասիրել այն` հետագայում նման չարաշահումները բացառելու նպատակով: 
Նամակին կից Ձեր ուշադրությանն ենք ներկայացնում նաև այն տեսահոլովակները, որոնք նկարահանվել են մայրաքաղաք Երևանի տարբեր սուպերմարկետներում` Ամանորյա տոն օրերին»։

Լևոն Հովհաննիսյան
Ֆեյսբուքյան «Հաց տվե՛ք» միջոցառման (http://www.facebook.com/events/510481125639154/) համակարգող»