Սերժ Սարգսյանի նախընտրական քարոզչության շրջանակներում ներկայումս նոր երգի հիման վրա տեսահոլովակ է նկարահանվում: Այս մասին երեկ «Հայկական ժամանակ» թերթի թղթակցի հետ զրույցում հայտնել է «Շարմ» հոլդինգի տնօրեն, պրոդյուսեր Ռուբեն Ջաղինյանը:

«Տեսահոլովակը նկարահանում է հենց «Շարմ» հոլդինգը: Ջաղինյանը հրաժարվել է մանրամասներ ներկայացնել, թե ովքեր են երգի կատարողները, ովքեր են նկարահանվում տեսահոլովակում՝համարելով, որ այդ տեղեկատվությունը տրամադրելը կոռեկտ չէ: Նա միայն ասել է, որ երգը, որի հիման վրա տեսահոլովակը ստեղծվում է, նվիրված է Սերժ Սարգսյանին: Ռ. Ջաղինյանը մեր թղթակցին հայտնել է նաեւ, որ «Շարմը» չի զբաղվում Սերժ Սարգսյանի ամբողջ քարոզարշավով: Ընկերությունը որոշ հատվածի պատասխանատվություն է միայն վերցրել եւ սահմանափակվել տեսահոլովակ նկարահանելով: Իսկ ամբողջ քարոզարշավի պատասխանատվությունը, ինչպես տեղեկացնում են ՀՀԿ-ից, կիսում են մի քանի ՀՀԿ-ականներ»,- գրում է «Հայկական ժամանակը»։