Հոգեբույժ Մարուքե Եղյանն այսօրվա ասուլիսին հայտնել է, որ ամանորյա  տոներին  հատկապես տղամարդիկ խմիչք,  մեծ քանակով սնունդ են  օգտագործում, որն էլ առաջաջացնում է օրգանիզմի ծանրաբեռնվածություն: «Ամանորյա տոների ժամանակ տեղի է ունենում կյանքի բնականոն ռիթմի խանգարում: Դա է պատճառը, որ Նոր տարուց հետո ինձ դիմող հիվանդների թիվն ավելանում է»,-նշել է հոգեբույժը։

Խոսելով հետտոնական սթրեսներից խուսափելու մասին, ասուլիսի մեկ այլ բանախոս, հոգեբան Խաչատուր Գասպարյանը նշել է, որ հանգստանալը չպետք է ընկալվի սննդի,  կերակուրի հետ՝ ինչն առկա է մեզանում։ «Ցանկացած անսովոր իրավիճակում, կարևոր չէ դրական, թե բացասական հույզեր են, մարդու օրգանիզմում կարող են սրվել գոյություն ունեցող խնդիրները»,-ասել է հոգեբանը:

Ըստ բանախոսի՝ մենք տրավմատիկ անցյալ ունեցող ազգ ենք. «Դա է  պատճառը, որ մեռելոցների ժամանակ կարողանում ենք  լավ ձևով կազմակերպել ամեն ինչը, իսկ տոների ժամանակ լիարժեք չենք կարողանում ուրախանալ: Ինչպես ասում են՝ ամեն մի ուրախության մեջ մի տեսակ տխրություն կա»։

 7օr.am