Դեռևս ս/թ. հոկտեմբերի 25-ին մեր նախաձեռնությունները մամուլին ներկայացրել էին Հայաստանի Հանրապետությունում բնության ահագնացող չափերի ավերման, բնական ռեսուրսների անխնա շահագործման եւ տնտեսության ոչ ռացիոնալ զարգացման վերաբերյալ հայտարարություն և կից ներկայացրել հիմնախնդիրները հիմնավորող տեղեկանք. http://hetq.am/arm/news/19853/pataskhanatvutyan-kanchel-hh-bnapahpanutyan-nakhararin-ev-xekavar-kazmin.html:

     Նշյալ բողոքը և պահանջները դեկտեմբերի 5-ին պաշտոնական նամակի տեսքով ներկայացվել են նաև ՀՀ վարչապետին և գլխավոր դատախազին:

   Ավաղ, լրանում է արդեն երկրորդ ամիսը, մեր նախաձեռնությունները տեղեկացված չեն մեր բողոքի ոչ քննարկման ընթացքի, ոչ էլ արդյունքների մասին: Այնպիսի տպավորություն է, որ ՀՀ կառավարությանն ու Ձեր աշխատակազմին, ինչպես նաև դատախազությանը, բացարձակապես չեն հետաքրքրում մեր կողմից բարձրացված հույժ կարևոր և առանցքային հարցերը, որոնք պետական մոտեցում և լուծում են պահանջում, այլ ոչ թե՝ անտարբերություն:

Եվս մեկ անգամ նշում ենք, որ մենք ունենք բավարար ներուժ, որպեսզի թույլ չտանք, որ մեր բնության հաշվին տնտեսական գործունեություն ծավալվի, պետության բնական հարստությունն անխնա ու անհավասար բախշմամբ շահագործվի, և Հայաստանը վերածվի հանքահումքային կցորդի: Մենք համոզված ենք, որ Հայաստանը կարող է ունենալ մշտակայուն տնտեսական զարգացում` ռեսուրսների ողջամիտ ու խնայող օգտագործմամբ ու այլընտրանքային ոլորտների խթանմամբ: Ակնկալում ենք գործուն և կտրուկ քայլեր, այլ ոչ թե իմիտացիոն բնույթի միջոցառումներ և զգացմունքային ու հրապարակային երկարաշունչ ելույթներ:

Այսպիսով, կրկին դիմում ենք  ՀՀ վարչապետին և դատախազությանը` առաջարկելով արձագանքել մեր նախաձեռնությունների կողմից 05.11.2012թ. իրենց ուղղված մեր բողոքին և դրան կից ներկայացված տեղեկանք-հիմնավորմանը և առաջնահերթ լուծել ՀՀ բնապահպանության նախարար Ա. Հարությունյանին պատասխանատվության կանչելու և նրա՝ ՀՀ բնապահպանության նախարարի պաշտոնում մնալու նպատակահարմարության հարցերը:

Գտնում ենք, որ ՀՀ բնապահպանության նախարարության համար պետք է գերակա լինի պետական հարստության ողջամիտ և բանական օգտագործումը, շրջակա միջավայրի շարունակական բարելավումը ներկա և ապագա սերունդների համար, այլ ոչ թե բիզնես միջավայրի բարելավումը` ի հաշիվ բնության:

Այսպիսով, ակնկալում ենք, սեղմ ժամկետում ստանալ պաշտոնական գրավոր արձագանք, ինչպես նաև՝ գործողությունների հստակ և տեսանելի արդյունքներ:

  «Թռչկան» քաղաքացիական նախաձեռնություն

«Խոսրովի արգելոց» քաղացիական նախաձեռնություն

«Ջերմուկը հանք չի դառնա» քաղացիական նախաձեռնություն

«Թեղուտի պաշտպանության» քաղաքացիական նախաձեռնություն