Հարցազրույց ՀՀԿ խմբակցության պատգամավոր Կարինե Աճեմյանի հետ

–Ինչպե՞ս եք գնահատում ԲՀԿ–ի նախաձեռնած քաղաքական քննարկումները, որոնք արդեն մեկնարկել են ՀԱԿ–ի և ՀՅԴ–ի հետ։

–Բոլոր ձևաչափերը, բոլոր բանակցությունները բոլոր քաղաքական ուժերի միջև, կարծում եմ, եթե նույնիսկ կոնկրետ արդյունքներ չտան, շատ կարևոր են։ Որովհետև բանակցությունների ընթացքում քաղաքական ուժերը, գործիչները իրար հետ շփվում են, հարաբերություններն ավելի կառուցողական են դառնում։ Միայն ժխտելով, միայն չընդունելով՝ երևի թե չի կարելի։ Նկատի ունեմ, որ հարաբերությունների հստակեցման առումով շատ կարևոր է բոլոր ուժերի իրար հետ համագործակծությունը։ Ինչ վերաբերում է տվյալ հարցին, ապա դա էլ մոտեցում է, տեսակետ է, և լավ է, որ խորհրդակցում են ինչ–որ ուժեր իրար հետ։

–Բայց ՀՀԿ–ն չի ընդունել քաղաքական խորհրդակցությունների ԲՀԿ–ի առաջարկը։ Ավելին, ՀՀԿ խոսնակ Էդուարդ Շարմազանովը դա անվանեց պլատոնական սիրախաղ և բլեֆ։

–Գիտեք, ինքն իրավունք ունի իր տեսակետը հայտնելու։ Ես այդ ասպեկտով չեմ նայում այդ հարցին, որովհետև ասացի, որ կարևորում եմ տարբեր քաղաքական ուժերի իրար հետ բանակցությունները։ Դրանց ընթացքում շատ բաներ են ի հայտ գալիս, շատ հարաբերություններ հստակեցվում են, և ես դա նորմալ եմ գնահատում։

–Գուցե իրո՞ք ժամանակն է, որ Հայաստանն անցնի խորհրդարանական կառավարման համակարգին, որովհետև փաստն այն է, որ կիսանախագահականն արդյունավետ չէ։

–Մենք չենք գտնում, որ ժամանակն է։ Ես ինքնս միշտ ասել եմ, որ մեզ մեծամասնական ընտրակարգը շատ պետք է, կարևոր է, և այս ժամանակահատվածում պետք է այս ձևաչափով աշխատենք։ Իհարկե, պետք է քննարկել, բայց մենք մեր մոտեցումը հստակ հայտնել ենք, մենք հակված չենք փոխելու մեր դիրքորոշումը։

–ՀՀ երկրորդ նախագահ Ռոբերտ Քոչարյանն իր տեսակետը հայտնեց մեծամասնական ընտրակարգի մասին՝ նշելով. «Հայաստանում մեծամասնական ընտրակարգը նպաստում է տարածքների ֆեոդալականացման գործընթացին` ընտրատարածքների սահմաններում, ընդ որում իշխանությունը կամա թե ակամա աջակցում է դրան, քանի որ միտված է վերարտադրման։ Երևույթը չափազանց վնասակար է, և որքան շուտ դրանից հրաժարվենք` այնքան լավ: Իմիջիայլոց, հենց այդ պատճառով մեծամասնական պատգամավորների թիվը մեզանում բազմիցս կրճատվեց: Ափսոսում եմ, որ ես չավարտեցի այդ գործընթացը: Ինչո՞ւ չավարտեցի: Հասարակ պատճառով. իշխանությունն ուզում էր «ֆորա» ունենալ միամանդատ ընտրատարածքներով»։ Ստացվում է, որ այս հայտարարության թիրախը ՀՀԿ–ն է՞, որովհետև ինքն անկուսակցական էր, իսկ օրենք փոխող մեծամասնությունը ՀՀԿ–ն։

–Շատ հարգում եմ և՛ երկրորդ նախագահին, և՛ իր տեսակետը, բայց ես արդեն իմ կարծիքն ասացի։ ՀՀԿ–ն էլ է գտնում, որ այդ խորհրդակցությունները ժամանակավրեպ են, բայց չի կարելի ասել, որ մենք դա երբեք չենք քննարկի։ Որովհետև պետությունը զարգանում է, միշտ առաջ է գնում, փոխվում են և՛ իր առջև դրված խնդիրները, և՛ ընդհանրապես ամեն ինչ փոխվում է երկրում, ու հնարավոր է, որ մենք էլ մի օր անդրադառնանք դրան։ Բայց հիմա մենք գտնում ենք, որ դրա ժամանակը չէ։ Ի դեպ, կան Եվրոպական, Մերձբալթյան երկրներ, որոնք անցել են ամբողջովին համամասնական ընտրակարգին և հիմա արդեն նորից սկսել են վերանայել իրենց Ընտրական օրենսգիրքը։ Որովհետև փորձը ցույց է տվել, որ մեծամասնական ընտրակարգով ընտրված պատգամավորը շատ մոտ է կանգնած բնակչությանը, շատ հարցերում շատ ավելի ակտիվ է նրանց հետ աշխատում, և այդ ընտրակարգը չի կարելի փոխել։ Երկրներ էլ կան, որոնք ընդհանրապես միայն մեծամասնական ընտրակարգն են ընդունում։

–Ստիպված եմ կրկին մեջբերել Շարմազանովի խոսքերը, ով պնդեց, որ ձեր, այսինքն ՀՀԿ–ի «այո»–ն այո՛ է, «ոչ»–ը՝ ո՛չ, և եթե դուք դեմ եք եղել 100%–ով համամասնական ընտրակարգին, ապա այլ կուսակցությունների նման կարծիք չեք փոխում և կշարունակեք դեմ լինել։ Իսկ կոնկրետ դուք ասում եք, որ հնարավոր է՝ հետագայում քննարկեք այդ հարցը։

–Ես չեմ բացառում, որ երբևէ՛ կքննարկենք։ Ես չեմ կարծում, որ մենք երբե՛ք չենք անդրադառնա այդ հարցին։ Հնարավոր է հինգ, տաս, չգիտեմ քանի տարի հետո մենք էլ անդրադառնանք դրան։ Բայց հիմա դրա ժամանակը չէ։

Հարցազրույցը վարեց Արեգնազ Մանուկյանը