Հունիսի 11-ից 14-ը Երևանի պետական համալսարանում կանցկացվի «Սոցիոլոգիան խաչմերուկներում» խորագրով Սոցիոլոգիայի համաշխարհային կոնգրեսը։ Այսօր տեղի է ունեցել Սոցիոլոգիայի միջազգային ինստիտուտի 39-րդ համաշխարհային կոնգրեսի բացման արարողությունը։

Կոնգրեսին մասնակցելու են սոցիալական գիտությունների ներկայացուցիչներ Իմանուել Վալերստեյնը, Միշել Վիվյորկան, Էդվարդ Թիրիքյանը, Լև Գուդկովը, Միխայիլ Գորշկովը և այլք։ Աշխատանքներում ընդգրկված են 89 համալասարաններ և գիտահետազոտական կենտրոններ ավելի քան 50 երկրից։

Բացման արարողությանը ներկա էր նաև ՀՀ վարչապետ Տիգրան Սարգսյանը։ Նա իր ելույթում ասել է.

-Մենք հուսով ենք, որ Կոնգրեսը կօգնի մոտենալ մեզ մտահոգող հետևյալ հարցերի պատասխաններին.

1. Արդյոք ներկայիս ճգնաժամը սոցիալակա՞ն, թե՞ ֆինանսատնտեսական բնույթի է
2. Հնարավո՞ր է, արդյոք, ուրվագծել համակեցության  նոր շրջանակները՝ ինչպիսին է պոստինդուստրիալ աշխարհի ձևավորման ճանապարհը
3. Ի՞նչ փոփոխություններ են տեղի ունենալու ազգերի ինքնակազմակերպման ձևերի և բովանդակության միջև
4. Կա՞ արդյոք նոր պարադիգմ, որն ապահովում է բազմազանությունների համերաշխ համակեցությունը
5. Գտնել նույնականացման որոնման բանաձևերը ազատ մտածողության դարաշրջանում։