Հարցազրույց Հայաստանի Մարքսիստական կուսակցության նախագահ Դավիթ Հակոբյանի հետ

-Ըստ Ձեզ, հետընտրական զարգացումները ի՞նչ հունով են ընթանալու։

-Հետընտրական գործընթացներն առայժմ սկսված չեն։ Երբ կձևավորվի Երևանի ավագանին, և վերջնականապես պարզ կլինի՝ այնտե՞ղ է ըննդիմությունը, թե՞ ոչ, այն ժամանակ էլ կհստականա, թե հետընտրական զարգացումներն ինչ տրամաբանությամբ են ընթանալու։ Իսկ այսօր նման եզրակացություններ անելը դեռևս վաղ է։

-Շարունակու՞մ եք պնդել, թե Հայ ազգային կոնգրեսը չպետք է հրաժարվի քաղաքապետարանի մանդատներից։

-Ես դա պնդել եմ, պնդում եմ և կպնդեմ։ Ի վնաս ինձ։ Ես քարոզում եմ ի վնաս ինձ, որովհետև եթե առաջին 13 տեղերի մանդատները ՀԱԿ-ը չի վերցնում, ես մտնում եմ արենա։ Հասկացա՞ք։

-Ճիշտն ասած՝ այնքան էլ չէ։

-Ես պնդում եմ, որ ի շահ ազգային գաղափարների՝ մանդատներ վերցնելը պատմական, քաղաքական անհրաժեշտություն է։

-Արդյոք այդ դպքում չի՞ փոխվում տերպետրոսյանական ընդդիմության պայքարի տրամաբանությունը։

-Մի փոքրիկ պատմական էքսկուրս, որպեսզի ավելի հասկանալի լինի։ Հեղափոխությունից առաջ Լենինը կոչ չէր անում Մոսկվայի և Պետերբուրգի Պետդումաները բոլշևիկաթափ անել, այլ ասում էր, որ դրանք պետք է ուժեղացնել բոլշևիկներով։ Իսկ հեղափոխությունից ուղիղ 24 ժամ առաջ Կենտրոնական Կոմիտեին գրած իր նամակում ասում էր, որ այսօր համարձակությամբ կարելի է վերցնել իշխանությունը, որովհետև Մոսկվայի և Պետերբուրգի դումաներում մեծամասնությունը բոլշևիկներ են։ Այսքանը բավակա՞ն է որպես ապացույց։

-Դասական օրինակները կարծես չեն տարածվում Հայաստանի քաղաքական դաշտի վրա։ Վերցնենք նույն քաղաքապետի ընտրությունները... Ի դեպ, ինչպե՞ս եք դրանք գնահատում։ ՀԱԿ-ը դրանք որակեց որպես խայտառակ, Հանրապետականը՝ մեկ քայլ առաջ։

-Ես, ի տարբերություն Հանրապետականների և այսպես կոչված ՀՀՇ-ական ընդդիմության քարոզիչների, շառլատանության փոխարեն ընդամենը մեկ բառով եմ բնութագրում այս ընտրությունները՝ իշխանագողություն։ Վե՜րջ։ Աբսուրդ է՝ գալ դատարան և պահանջել իշխանությունը գողից վերցնել ու տալ գողին։ Կատարյալ մանկամտություն է՝ պահանջել ընտրությունների արդյունքները անվավեր ճանաչել։

-Կանխորոշվա՞ծ էին ընտրությունների արդյունքները, և արդյոք դա՞ չէին վկայում նախընտրական շրջանում ներկայացված հարցումները։

-Ահարոն Ադիբեկյանի թվերը պլանավորված պատվեր էին։ Միշտ էլ այդպես է եղել։ Նրա այսպես կոչված «սոցհարցումները» ցույց են տալիս այն, թե ինչպես պետք է սցենարը զարգանա։ Այդ մարդը միշտ էլ կատարում է իշխանության պատվերը։ Այդ իսկ պատճառով ես ասել եմ՝ նա խաբեբա է և ավազակ։ Ահարոն Ադիբեկյանին հավատալ չի կարելի։

-Ստացվում է, որ Ահարոն Ադիբեկյանն այն լակմուսի թուղթն է, որը ցույց է տալիս, թե ընտրությունները ի՞նչ սցենարով են ընթանալու։

-Ահարոն Ադիբեկյանն իշխանությունների սոցիոլոգիական հարցումների անցկացման трубодурн է՝ շեփորահարը։ Этим все сказано.

-Հայաստանն իրար հաջորդած ծանր ընտրություններից հետո մտավ հետընտրական փուլ։ Ի՞նչ զարգացումներ են հնարավոր։

-Կրկնում եմ՝ ամեն ինչ կախված է լինելու նրանից, թե ՀԱԿ-ը կվերցնի՞ քաղաքապետարանի մանդատները, թե՞ ոչ։

-Եթե չվերցնի, ի՞նչ է լինելու։

-Երեկ ԿԸՀ-ում ասվեց, որ 131-րդ հոդվածի համաձայն՝ եթե նրանք պաշտոնապես չեն ներկայանում Կենտրոնական ընտրական հանձնաժողով և հրաժարականի հայտարարագիր չեն լրացնում, ապա դրանով իսկ վերցնում են մանդատները։ Եվ ուզում են իրենց աշխատանքային սաբոտաժն ու պորտաբուծությունը քողարկել այսպես կոչված բոյկոտի կեղծ գաղափարի տակ։ Այնպես, ինչպես որ դա արեց «Արդարություն» դաշինքը, որի անդամներն այսօր վխտում են նախագահի շքախմբում։

Զրույցը վարեց Վախթանգ Մարգարյանը