«Բարգավաճ Հայաստան» կուսակցության նախագահ, նույնանուն խմբակցության ղեկավար Գագիկ Ծառուկյանը Երևանի ավագանու ընտրություններից հետո չէր հանդիպել լրատվամիջոցների հետ, ուստի պատրաստակամ պատասխանեց լրագրողների բոլոր հարցերին:

-Ընտրության արդյունքները Ձեզ բավարարու՞մ են:

-Իհարկե չեն բավարարում, բայց, համենայն դեպս այնքան էլ գոհացուցիչ չեն մեր ձայները: Ինչքանով որ մեզ ձայն են տվել, այնքանով մենք պետք է կարողանանք մեր ժողովրդի ձայներին տեր կանգնենք: Դա, իհարկե, բոլորն էլ կտեսնեն:

-Վարչական տարածքների ղեկավարներ ունենալու՞ է ԲՀԿ-ն:

-Ոչ, մենք քաղաքային իշխանություն, կոալիցիա չենք ստեղծելու: Իրենք վերցրել են, հաղթել են, իրենք էլ պետք է պատասխան տան, իրականացնեն իրենց խոստումները և ծրագրերը: Իսկ մենք հետևողական ենք լինելու ժողովրդի փոխարեն:

-Իսկ Նուբարաշենու՞մ:

-Եթե հարկ լինի, կարող ենք դա էլ հանձնել, որովհետև Նուբարաշենում արդեն մի 3 թե 6 տարի է, մեր կուսակցության անդամն է աշխատում, այնպես որ այդպիսի խնդիր չկա:

-Պարոն Ծառուկյան, ինչու՞ եք դժգոհություն ներկայացնում, որ Ձեր ուզած ձայները չստացաք, թե՞ ընտրակեղծիքներ իրականացվեցին:

-Դե իհարկե, Դուք գիտեք, որ ընտրակեղծիքներ եղել են, որ հիմա դատախազությունն այդ առնչությամբ համապատասխան գործ է վարում: Բարգավաճ Հայաստանը գոհ է ժողովրդի վստահությունից, քանի որ այսօր միայն մենք ամբողջ պետական լծակի դեմ էինք պայքարում: Ամենակարևորն այն է, որ ժողովրդի մեջ կա վստահություն, հավատ, մենք էլ պետք է կարողանանք այդ վստահությունը իրականացնել: Ամենաթանկ բանը ժողովրդի վստահությունն է:

-Լծակներ ասելով Դուք հանրապետականի՞ն նկատի ունեիք:

-Բա էլ ու՞մ նկատի ունեմ:

-Կարո՞ղ ենք արձանագրել, որ Դուք  դժգոհ եք ընտրությունների արդար, թափանցիկ ընթացքից:

-Լիարժեք դժգոհ չեմ, բայց որ գոհացուցիչ չի եղել, դա է  փաստը:

-Անվտանգության խորհրդում Ավետ Ադոնցին ո՞վ է փոխարինելու:

-Դեռ չգիտեմ, դեռ չենք որոշել: Երբ որոշենք, դուք անպայման տեղյալ կլինեք:

-Հարկային փաթեթի օրինագծի փոփոխությունների վերաբերյալ ո՞րն է Ձեր տեսակետը:

-Քանի որ ես խոշոր գործերի բաժնետոմսեր ունեմ, դրա համար չեմ խառնվում, որ ավել-պակաս խոսակցություններ չլինեն: Թե չէ միշտ ասում են, թե Ծառուկյան Գագիկը հարկեր չի տալիս: Դրա համար ես չխառնվեցի: Բայց ես մի անգամ ասացի, որ տարեկան իմ օգուտը կազմում է 35-40 միլիոն դոլար: Այսօր որևիցե մի խոշոր գործարար, որ մեծ-մեծ խոսում են, թող ներկայացնի իր դեկլարացիան: Դրա համար ես չեմ խառնվել, ասել եմ, որ իմ բոլոր կուսակից ընկերները, պատգամավորները ազատ են իրենց որոշման մեջ:

-Ինչու՞ է կառավարությունը նման նախագիծ ներկայացրել, ո՞րն է Ձեր տեսակետը:

-Այդ հարցին չեմ կարող պատասխանել, որովհետև այդ հարցով ես չեմ զբաղվում, քանի որ էլի քարը գլորելու են Ծառուկյանի վրա:

-Հանրապետության նախագահը մայիսի 28-ին կոչ արեց կուսակցություններին համաներման մասին հայտարարությամբ հանդես գալ: Դուք դիմե՞լ եք նախագահին:

-Մենք արդեն ներկայացրել ենք:

Պատրաստեց Սյուզի Մելքոնյանը