Երևանի ավագանու ընտրությունները մենք դիտարկում էինք իբրև քաղաքական համակարգի կայացման, մայրաքաղաքի կառավարման նոր մոդելի ձևավորման, 2008թ. Նախագահական ընտրություններից հետո ստեղծված առճակատման ու  թշնամանքի մթնոլորտի հաղթահարման, հասարակության համախմբման հնարավորություն:

    Մենք նաև հավատում էինք, որ արդարացի ընտրությունների պարագայում առիթ կընձեռվի  երկրում ժողովրդավարության հիմքերն ամրապնդելու և ապացուցելու, որ կարող ենք զարգացման նոր Ճանապարհ դուրս գալ:  Ցավոք այդպես չեղավ.

   Հերթական անգամ կատարվեց այն, ինչ տեղի էր ունեցել նախկինում: Դարձյալ ընտրություններում դերակատար եղան թաղային և օլիգարխիկ հեղինակությունները, ընտրակաշառքը, վարչական լծակների օգտագործումը:

   Փաստորեն՝ գաղափարական մոտեցումները, ծրագրային հարցադրումները, նպատակային անելիքները որոշիչ չեն դառնում մեր քաղաքացիների մեծամասնության ընտրության հարցում:

   Անկախ այն հանգամանքից, թե որքանով է ավագանին ձևավորող քաղաքական ուժերի համամասնությունը համապատասխանում մայրաքաղաքում նրանց ունեցած իրական վարկանիշին, համայնքային այս ընտրությունների արդյունքում ՀՅ Դաշնակցության արձանագրած արդյունքի պատճառները մենք հակված ենք փնտրել միայն մեր աշխատանքի մեջ: Մենք՝ պարտավոր էինք մեր  հավաքական և անձնական օրինակով ապացուցել և ժողովրդին հասանելի դարձնել մեր դավանած ճանապարհի ճշմարտացիությունը:

  Միևնույն ժամանակ  արձանագրում ենք, որ ընտրությունները չընթացան գաղափարական ծրագրային հիմքի վրա, և այս առումով ՀՅԴ-ի և նրա քաղաքապետի թեկնածու Արծվիկ Մինասյանի ջանքերը ըստ արժանավույնս չարդյունավորվեցին: Ցավոք, մեր քաղաքացիները շարունակում են հիմնականում քվեարկել՝ տուրք տալով իշխանությունների վարչական ճնշամիջոցներին, ընտրակաշառքներին և ամբոխավարությանը:

        Իրավական առումով Երևանի ավագանու ընտրությունների հետ կապված խնդիրներ հարուցելը գտնում ենք անօգուտ և աննպատակահարմար: Բայց մեր քաղաքական եզրակացությունը հստակ է. նմանատիպ ընտրությունները հանցավոր անպատասխանատվություն են մեր պետության, ժողովրդի և մեր երեխաների հանդեպ և Դաշնակցությունը երբեք չի համակերպվելու այս իրավիճակի հետ:

    Առանց մատնանշելու կոնկրետ ընտրախախտումները՝ ԿԸՀ-ում ՀՅԴ ներկայացուցիչը , որպես շարունակական արատավոր այս երևույթների նկատմամբ քաղաքական անհամաձայնության արտահայտություն չի ստորագրելու այս ընտրությունների եզրափակիչ արձանագրությունը:

     Միևնույն ժամանակ կոչ ենք անում իշխանություններին, անհրաժեշտ նախադեպ ստեղծելով քաղաքական կամք դրսևորել և կեղծիքներով ու ընտրախախտումներով առավելապես աչքի ընկած ընտրատեղամասերում ընտրությունները ճանաչել անվավեր:

ՀՅԴ Հայաստանի Գերագույն Մարմին

1.06.2009թ.