Հարցազրույց ԱԺ ԲՀԿ խորհրդարանական խմբակցության պատգամավոր եւ «Տարածքային կառավարման եւ տեղական ինքնակառավարման»  հանձնաժողովի նախագահ Ստեփան Մարգարյանի հետ:

-Վերջին շրջանում մեծ աղմուկ բարձրացավ «Հարսնաքար»-ում տեղի ունեցած իրադարությունների շուրջ: Սկզբնական շրջանում, կարծեք, թե այս առումով համախմբվածություն կար քաղաքական ուժերի մեջ, սակայն ՀԱԿ-ի` ԱԺ արտահերթ նիստ գումարելու առաջարկից հետո, հարցը տարաբնույթ մեկնաբանությունների տեղիք տվեց: Դուք ինչպե՞ս կմեկնաբանեք այս զարգացումները:

-«Հարսնաքարի» դեպքերի շուրջ երկու գործընթաց ձեւավորվեց: Առաջինը խմբակցությունների կողմից արտահերթ նստաշրջան հրավիրելու գործընթացն էր, որը, ցավոք, չհավաքեց համապատասխան քանակով ստորագրություն: Պատճառը արձակուրդային սեզոնն էր, եւ պատգամավորների զգալի մասը պարզապես Հայաստանում չէին: Երկրորդ գործընթացը աշխատանքային խմբի ստեղծմանն էր վերաբերում, որն այդ դեպքի հետ կապված հարցեր էր պատրաստում` ուղղված Կառավարությանն ու ՀՀ դատախազությանը:  Ես անձամբ ներգրավված եմ եղել այդ աշխատանքային խմբում: Աշխատանքային խմբի գործունեությունը պետք է ավարտվեր նրանով, որ միասնական որոշվեին այն հարցերի շրջանակը, որոնք կուղղվեին Կառավարությանն ու Դատախազությանը, սակայն ամեն ինչ մի փոքր այլ կերպ դասավորվեց: Քանի, որ հանգստի սեզոն է եւ պատգամավորների բացակայության պատճառով ԲՀԿ-ն չի կարողանում նիստ հրավիրել ու որոշում կայացնել, այդուամենայնիվ մի քանի օր առաջ մեր խմբակցության քարտուղար Նաիրա Զոհրաբյանը հանդես եկավ հայտարարությամբ, որ իր կարծիքով ԲՀԿ-ն չպետք է միանա այնպիսի ձեւաչափով նախաձեռնության, որին մասնակցում է «Ժառանգությանը», քանի որ  այդ ամբողջ ընթացքում «Ժառանգությունն» իր գործունեությունն ուղղում էր ԲՀԿ-ի դեմ: Իմ կարծիքով այդ կուսակցության պահվածքն անհասկանալի է: Տպավորություն է, թե իրենց որոշումներն այլ տեղերում են կայացվում, այդ իսկ պատճառով էլ մենք նպատակահարմար ենք գտնում առժամանակ ձեռնպահ մնալ բոլոր այն նախաձեռնություններից, որտեղ կլինի «Ժառանգության» ստորագրությունը:

-Արդյոք, սրանից չի տուժի ընդհանուր քաղաքական պրոցեսը:

-Ճիշտ հակառակը, ես հակված եմ իրերն իրենց անուններով կոչել եւ կարծում եմ, որ հենց այդ պարագայում է, որ մենք կկարողանանք իրական խնդիրներ դնել եւ իրական արդյունքներ ստանալ:

-Այսինքն, եթե սեպտեմբեր ամսից վերսկսվի այդ աշխատանքային խմբի գործունեությունը, Դուք կրկին չե՞ք միանա:

-Ինչպես արդեն նշեցի, մենք պատրաստ ենք քննարկել ցանկացած խնդիր (ոչ միայն  «Հարսնաքարի» հետ կապած) այլ ուժերի հետ, իսկ «Ժառագության» հետ մենք պատրաստ ենք քննարկել ցանկացած խնդիր, երբ այդ քաղաքական միավորման իրական գործունեության   շարժառիթները մեզ եւ հասարակության համար հասկանալի եւ ընդունելի կլինեն:  

-Պրն. Մարգարյան, կարո՞ղ են հասարակությանը հուզող խնդիրները տուժել այս որոշումից:

-Միանշանակ կարող եմ պնդել, որ ոչ: Հասարակությունն էլ դրանում կհամոզվի աշնանը, երբ կտեսնի մեր եւ մի շարք այլ ուժերի համատեղ նախաձեռնություններն ու գործունեությունը` բոլոր այն խնդիրների շուրջ, որոնք հուզում են մարդկանց: Նշեմ նաեւ, որ ԲՀԿ-ն ծանրակշիռ եւ ինքնաբավ ուժ է եւ ունակ է հասարակական հնչեղության ցանկացած հարց բարձրացնել իր խողովակներով:

Աննա Եղիազարյան

zham.am