Երևանի ավագանու ընտրություններում ԿԸՀ-ի նախնական տվյալներով ձայների 0,47% ստացած Հայաստանի աշխատավորական սոցիալիստական կուսակցության նախագահ Մովսես Շահվերդյանը մայիսի 31-ին տեղի ունեցածը ոչ թե ընտրություն, այլ կամայական միջոցառում է համարում։

-Խորհրդային ժամանակներում ընտրություններ էին լինում, որոնց գրեթե ոչ ոք չէր մասնակցում, բայց ասում էին, թե մասնակցել է բնակչության 99,9 %-ը, և մեկ թեկնածու ստանում էր այդքան ձայն։ Հիմի էլ էդպիսի մի բան է։ Ցանկացած թիվ կարող էին գրել, և չէիք էլ կարող այնտեղ վիճել կամ ապացուցել։ Հանձնաժողովը ցանկացած պահի կարող է հրապարակել ցանկացած թիվ, և ոչ ոք դրա հակառակը չի կարող ապացուցել,- «7օր»-ին ասել է Մ. Շահվերդյանը։

Տեսնելով, որ պայքարն անիմաստ է, անգամ մինչև ժամը 20։00-ն ՀԱՍԿ-ն իր վստահված անձանց հետ է կանչել.

-Երիտասարդ աղջիկներ կային, մարդիկ անընդհատ անախորժ պատմությունների մեջ էին ընկնում՝ խոսում էին, վեճ էր դառնում։ Այդ մթնոլորտում անիմաստ էր նրանց պահելը։

ՀԱՍԿ-ի հետագա գործողությունները սահմանափակվելու են ընտրություններին գնահատական տալով՝ մարդկանց կոչ չեն անի փողոց դուրս գալ, դատարան չեն դիմի, որովհետև. «Աբսուրդ է, նույն որակն են թե՛ դատարանը, թե՛ հանձնաժողովը։ Ու՞մ բողոքենք»։