ՀՀ փաստաբանների պալատի պաշտոնական կայքում տեղադրված հաղորդագրության համաձայն՝ այսօր՝ հունիսի 11–ին, փաստաբանները մեկօրյա գործադուլ են հայտարարելու։ Փաստաբանների նախաձեռնող խմբի հաղորդագրությունում մասնավորապես ասված էր.

«Հարգելի փաստաբաններ, 2012թ. հունիսի 11-ը հայտարարվում է փաստաբանների մեկօրյա գործադուլի օր: Այդ օրը փաստաբաններով հավաքվելու ենք դահլիճում և լրագրողների ներկայությամբ ներկայացնելու ենք մեր պահանջները: Խնդրում ենք կից ուղարկվող տեքստին ծանոթանալ, և եթե միանում եք, հետադարձ նամակով տեղեկացնել այդ մասին: Տեղեկացնում ենք, որ արդեն մոտ 100 փաստաբաններ միացել են այս հայտարարությանը: Միաժամանակ նկատի ունենալով, որ 2012թ. հունիսի 11-ի միջոցառման ժամանակ ներկայացվելու են դատական համակարգում առկա բազմաթիվ խախտումներ և դրանց լուծման ուղիները, փաստաբանների դպրոցի կողմից այն համարվելու է վերապատրաստման դասընթացի օր: Փաստաբանների համար սա հիմք է, որպեսզի հարգելի համարվի դատական նիստին բացակայությունը, ինչի կապակցությամբ կարող է տրամադրվել համապատասխան տեղեկանք: Ակնկալում ենք ձեր ակտիվ մասնակցությունը»։