Հարգելի գործընկերներ,

Տիկնայք և պարոնայք,

Շնորհակալ եմ Ազգային ժողովի նախագահի բարձր պաշտոնում իմ թեկնածությունը կրկին առաջադրելու համար: Նախ և առաջ երախտապարտ եմ Հանրա­պետության Նախագահին նման վստահության համար, երախտագի­տու­թյան իմ խոսքն եմ ուղղում նաև իմ հարազատ կուսակցությանը, բոլոր իմ գործ­ըն­կերներին:

Հայաստանի Հանրապետության 5-րդ գումարման խորհրդարանը` այս խորհրդարանը, ներկայացուցչական մարմին է բառի ամենաուղղակի իմաստով. այսօր Ազ­գային ժողովում ներկայացված է Հայաստանի գրեթե ողջ քաղաքական դաշտն իր ամենալայն ներկապնակով: Ուրախ եմ, որ մեզ հաջողվել է լավ ընտրությունների միջոցով ձևավորել ուժեղ օրենսդիր մարմին: Վստահ եմ, որ ներկա Ազգային ժողովը մեր երկրում պառլա­մենտարիզմի ավանդույթները նոր մակարդակի է բարձրացնելու և դառնալու է քաղաքական միջավայրի հասունության իսկական խորհրդանիշ:

Ասել, որ մեծ հպարտություն ու լուրջ պատաս­խանատվություն եմ համարում նման խորհրդարանի ղեկավարի պաշտոնին առաջադրվելը, նշանակում է քիչ բան ասել: Ես լավ պատկերացնում եմ` ինչպիսի դերակատարություն է վերապահվելու Ազգային ժողովի նախագահին և հաստատապես պատրաստ եմ դրան:

Դեռ ընտրապայքարի ընթացքում ուշադրությամբ հետևել եմ այսօր արդեն խորհրդարանում ներկայացված բոլոր քաղաքական ուժերի կողմից բարձրաձայնվող նպատակադրումներին և ուսումնասիրել եմ բոլոր ծրագրերը: Տեսել եմ ահռելի ընդհանրություն հնչեցված խոսքի ու հռչակած մտադրությունների մեջ.

- բոլորն էլ առաջ էին քաշում սեփական ուժերին հավատալու անհրաժեշտությունը,

- բոլորն էլ պնդում էին փոփոխությունները շարու­նակելու կարիքը,

- բոլորն էլ ասում են, որ անհրաժեշտ է շարունակել պայքարը մեր կյանքի արատավոր երևույթների դեմ,

- բոլորն էլ խոսում են մարդու՝ որպես մեր երկրի ամենաէական և հիմնարար արժեքի մասին:

Դա շատ լավ է:

Դա նշանակում է, որ մեր հասարակությունը կայացել է որպես հավաքական պահանջարկ ձևավորող սուբյեկտ:

Դա նշանակում է, որ այդ կայացումն արդեն անշրջելի է:

Դա նշանակում է, որ մեր երկրի բոլոր ուժերը ակամայից համաձայնու­թյան են եկել ընդհանուր արժեքային համակարգի շուրջ:

Վերջիվերջո, դա նշանակում է, որ մենք բոլորս էլ, որքան էլ իրար քննադատենք, իրականում իրար շատ մոտ ենք մեր երկրի ապագայի պատկերացումների առումով և պատրաստ ենք միևնույն ճիշտ ուղղությամբ տանել մեր երկրի զարգացումը:

Ես հավատում եմ, որ մենք բոլորս էլ մեր երկրի հայրենասեր քաղաքացիներն ենք: Եվ այս տրամաբանությամբ կառուցված ընտրապայքարում հաղթել է ոչ թե մեկ քաղաքական ուժ, այլ ամբողջ Հայաստանը և մեր ժողովուրդը:

Համոզված եմ, որ սա միայն ու միայն ավելի ուժեղ է դարձնելու մեր երկի­րը: Վստահ եմ, որ դրանում շատ արագ կհամոզվենք Ազգային ժողովի գործունեության արդեն առաջին մի քանի ամիսների ընթացքում:

Եկել է աշխատելու ժամանակը:

Ու պիտի աշխատենք բոլորս միասին: Որովհետև մեր երկրի առջև ծառացած խնդիրները կարելի է միայն համագործակցաբար լուծել, որովհետև Հայաստանի յուրաքանչյուր քաղաքացու բարեկեցությունը կարելի է միայն միասնաբար բարձրացնել:

Հարգելի գործընկերներ,

Ազգային ժողովի գործունեության վերաբերյալ իմ ծրագրային մոտեցումները չեն փոխվել: Ընդհակառակը, անցած տարիների ընթացքում, հասցնելով տիրապետել խորհրդարանի գործունեության ամենաաննկատ կողմերին, անտեսանելի նրբություններին, ես այսօր առավել քան վստահ եմ ուժեղ և արդյունավետ խորհրդարանի վերաբերյալ իմ մոտեցումներում:

1. Այսօր էլ կրկնում եմ, որ խորհրդարանի բնականոն և արդյունավետ գործունեության համար առաջնային նշանակություն ունի փոխադարձ հարգանքի, հանդուր­ժողականության և գործընկերության մթնոլորտի ապահովումը։ Այս առումով պատահական չէ, որ ստանալով Ազգային ժողովում քաղաքական մեծամասնություն, Հանրապետական կուսակցությունը, ինչպես և նախկինում, այսօր էլ հանդես է գալիս որպես հանրային համերաշխության և բազմակողմանի համագործակցության համոզված կողմնակից:

Հինգ տարի մենք աշխատելու ենք միասին: Շատ բան ենք իմանալու միմյանց մասին, բազմաթիվ շինծու միֆեր են ցրվելու, շատ առիթներ են լինելու ներքուստ համոզ­վելու նախկին որոշ պատկերացումների կեղծության մեջ և կրկին հիշելու, որ պարտադիր չէ, որ մեր մտավախությունները լինեն դիմացինի մտադրու­թյունները: Այս խորհրդարանը լավ խորհրդարան է լինելու և հեղինակության խնդիր չի ունենալու: Համենայն դեպս ես եռանդ չեմ խնայի դրա համար:

Ամեն ինչ անելու եմ նաև, որ ցանկացած բանավեճ կամ անհամաձայ­նություն երբևէ չանդրադառնա խորհրդա­րանի բնականոն գործունեության և աշխա­տանքային մթնոլորտի վրա։ 

2. Ազգային ժողովը քաղաքական կյանքի առաջնային ամբիոնն է: Սա է քաղաքական բանավեճի բարձրագույն հարթակը: Այս դահլիճում են սկսվելու և ավարտվելու քաղաքական մտքի բոլոր հիմնական զարգացումները մեր երկրում և այստեղ են հատվելու Հայաստանի զարգացման ուղու վերաբերյալ մոտեցումներն ու տարբերվող տեսակետները: Ես եռանդ չեմ խնայելու բաց, ակտիվ և ծանրակշիռ դերակատարությամբ Ազգային ժողով կայաց­նելու ճանապարհին: Միասին ենք կայացնելու:

Օրինաստեղծ աշխատանքը դնելու ենք պրոֆեսիոնալ հիմքերի վրա: Ինչ խոսք, միշտ էլ կլինի պոպուլիստական հռետորաբանություն, կլինեն երևակայականը իրականի տեղ մատուցելու փորձեր. և դա բնական է: Բայց դա լինելու է բացառությունը, ոչ թե օրինաչափությունը, իսկ օրինաչափությունը լուրջ, համակողմանի կշռադատված, ամենօրյա հետևողական օրինաստեղծ աշխատանքն է լինելու, ինչի համար էլ մենք առաջին հերթին հավաքվել ենք այստեղ: 

3. Ազգային ժողով-կառավարությույն հարաբերություն­ները տեսնում եմ դինամիկ զարգացման հար­թությունում: Այո, կառավարությունը ձևավորում է իշխող քաղաքական ուժը և ես, որպես այդ քաղաքական ուժի ներկայացուցիչ, ունեմ կառավարության գործունեության վրա ազդելու ներկուսակցական հարթությունը: Միևնույն ժամանակ ես համոզված եմ, որ անկախ առկա այլ մեխանիզմերից, Ազգային ժողովն է, որ պետք է և կարող է առավել ընդգրկուն կերպով դիտարկել իրականացվող քաղաքական տարբեր ասպեկտները և նոր երանգներ հաղորդել: Չկասկածեք, որ որպես խորհրդարանի նախագահ ես չեմ վարանելու լինել կառավարության քննադատը բոլոր այն հարցերում, որոնք, իմ կարծիքով, լուծվում են անբավարար արդյունա­վետու­թյամբ կամ արագությամբ: Միևնույն ժամանակ ամբոխահաճո կամ ինքնանպատակ քննադատության դեպքում լինելու եմ կառավարության առաջին պաշտպանը, քանի որ ինձ համար չկան ինքնա­նպատակ գերատեսչական կամ կուսակցական շահեր, կա միայն Հա­յաստանի ու մեր ժողովրդի շահը, և հանուն դրա իրա­կանացվող գործունեությունն եմ միայն համարում արդարացված:  

4. Եվ վերջապես, ներկա իրողությունների պայման­ներում մենք պետք է լուրջ տեղ հատկացնենք խորհրդա­րանական դիվանագիտության զարգացմանը: Մեր որոշ հա­րևան­ներ լայն թափով հակահայ գործու­նեություն են ծա­վալում աշխարհի գրեթե բոլոր քաղաքական հարթակ­ներում: Նման ռեսուրսների դիմաց մենք պարտավոր ենք առավել արդյունավետ օգտագործել մեր բոլոր հնարավորություններն ու մեխանիզմները: Այս հարցում մեծ դեր ունի նաև խորհրդարանը, և մենք բոլորս շատ ակտիվ պետք է լինենք ամենատարբեր ձևաչափերում մեր երկրի շահերին հետամուտ լինելու հարցում:

Սրանք էին իմ հիմնական մոտեցումները Ազգային ժողովի գործունեության առանցքային ուղղությունների վերաբերյալ: Դրանք չեն փոխվել վերջին տարիների ընթացքում: Փոխվել են միայն իմ համոզմունքները խորհրդարանի, համագործակցային միջավայրի և հա­մատեղ աշխատանքի դրական ներուժի մասին: Դրանք շատ ավելի ամուր են դարձել: Եվ ես պատրաստ եմ իմ այդ համոզմունքներով վարակել յուրաքանչյուրին:

Մեկ անգամ ևս շնորհակալություն եմ հայտնում Հա­յաստանի Հանրապետության Ազգային ժողովի նախա­գահի բարձր պաշտոնում իմ թեկնածությունն առա­ջադրելու և ինձ աջակցելու համար:

Շնորհակալություն: