Այսօր Արաբկիր բժշկական համալիրին կից երեխաների և դեռահասների առողջության ինստիտուտի տնօրեն Սերգեյ Սարգսյանը ներկայացրել է ինստիտուտի կողմից 2010թ. երկրի բոլոր դեռահասների շրջանում անցկացված հետազոտության արդյունքները։ Հետազոտության համաձայն՝ 15 տարեկան տղաների 8, իսկ նույն տարիքի աղջիկների 0,6% ամեն օր ծխում է: Ծխախոտ օգտագործել է 13 տարեկան տղաների 13%-ը և 11 տարեկանների 0,1%-ը։

Բժիշկը հայտնել է, որ երեխաների համար չափազանց վտանգավոր է ոչ միայն ծխախոտի օգտագործումը, այլև ծխի միջավայրում գտնվելը։

–Երեխաները, որոնք գտնվում են ներտնային ծխի միջավայրում, արդեն ապացուցված է՝ հակված են հիվանդանալու սուր շնչառական հիվանդություններով,-ասել է բժիշկը:

Բժշկի խոսքով՝ անգամ եթե հետագա տարիներին երեխան այլևս չշնչի ծխախոտի ծուխը, նա, միևնույն է, շնչառական խնդիրներ է ունենալու։ Բժիշկը հայտնել է նաև, որ այլևս գոյություն չունի պասիվ ծխողներ հասկացությունը, և այժմ գրեթե տարբերություն չկա՝ մարդը ծխո՞ւմ է, թե՞ գտնվում է ծխի միջավայրում։