Մայիսի 11-ին «Նարեկացի» արվեստի միությունում կայացավ քանդակագործ Սողոմոն Մելիքյանի փայտե քանդակների ցուցահանդեսի բացումը:  Քանդակագործի աշխատանքներն ինքնատիպ տեսք ունեն. առաջին հայացքից դրանք կիսավարտ են, անչափ մոտ բնությանը: Աշխատանքները ծառի արմատներից են, ասես արվեստագետն ուղղակի որսացել է բնության պատկերները, ֆիքսել պահի շարժումը:

Արվեստագետի թեմատիկան  բնությունն  է, իսկ դա պատկերող քանդակներն ընդգծում են հեղինակի նուրբ ու զգայուն ներաշխարհը: Ներկաներից շատերը  նշեցին, որ ցուցահանդեսը կարծես  մարդ-բնություն ներդաշանակությունն արտահայտի. «Հետաքրքիր է, չէ, զգայուն աչքն ինչ բան է. մենք նայում ենք, ու չենք տեսնում, նա նայել է ու տեսել: Տպավորված եմ», -ասաց այցելուներից Նաիրան:

Ցուցահանդեսը կրում է «Կյանքի արմատ»  խորագիրը. «Նյութի  մեծ մասը ծառի արմատներն են: Ես դրանք դեն չեմ նետել, նորից կյանք եմ տվել:

Աշխատել եմ շատ չմշակել դրանք, թողնել այնպես, ինչպես կան, քանի որ բնությունն է կատարյալ ստեղծագործողը»,-ասաց Սողոմոն Մելիքյանը:

Նրա խոսքերով ինքը երբեք չէր մտածի, որ ցուցահանդես կարող է ունենալ:

«Ընկերներս են այնպես արել, որ կայանա այս ցուցահանդեսը:  Այս հարցում ՆԱՄ-ի դերակատարումն էլ շատ մեծ  էր, քանի որ այստեղ բացի օժանադակելը նաեւ խորհուրդներ տվեցին, ոգեւորեցին»,-հայտնեց քանդակագործը:

Ցուցահանդեսի բացման ընթացքում ՆԱՄ նախագահ Նարեկ Հարթունյանը Ս. Մելիքյանին հանձնեց խորհրդանշական նվերները`   հայտնելով, որ  ուրախ է ՆԱՄ հյուրընկալ տանիքի տակ տեսնել  բնության եւ մարդու համատեղ  այս հազվագյուտ ստեղծագործությունները :

Ս. Մելիքյանի աշխատանքները կարող եք դիտել նաեւ մայիսի 12-ին:

Մարիամ Մուղդուսյան

Նարեկացի արվեստի միություն